زیناو ناپاكی هاوسەریەتی
دووشەممە, 04 شوبات 2019 07:30

مەحەمەد تۆفیق بالیسانی سەرپەرشتیاری پەروەردەیی

دروست بوونی هەر كۆمەڵگەیەك لە ئەنجامی پڕۆسەی هاوسەریەوە دێتە كایەوە، چونكە هاوسەریی تاكە ڕێگەی ڕێكوپێكە بۆ وەچە خستنەوە و بەستنی پەیوەندیەكان و بەڕێوەبردنی پڕۆسەی پێگەیاندنی كۆمەڵایەتی، كە لە مێشەوە بونێك دێتە ئاراوە كە پێ ی دەوترێت خێزان، هەرچەندە ئەم دەزگایە تەندروست بێت و بێ كێشە بێت ئەوەندە كۆمەڵگەش سەلامەت و كەم كێشە دەبێت، بە پێچەوانەوەش چەند درزو گرفت و ناڕێكی و نەخۆشی تووشی ئەم دەزگایە بێت ئەوەندەش كۆمەڵ بەرەو هەڵدێر و هەڵوەشانەوە دەڕوات، ئەوەی ڕوون و ئاشكرایە هیچ خێزانێك بە بێ كێشە و گرفت نەبووە و ناشبێ، بەڵام هەندێ گرفتی نەخوازراو هەیە كە نەك هەر پەیوەندی لە نێوان ئەندامانی لاواز دەكات, بەڵكو كارەسات بۆ سەرتاپای كۆمەڵگەش دروست دەكات، بەڵام ئەوەی جێگەی باسە زینا و ناپاكی هاوسەری دوو كارەساتی كۆمەڵایەتین، كە پەیوەندیان بە یەكەوە هەیە و تا ڕادەیەك زۆر یەك بەرئەنجامیان هەیە، هەردووكیان دوو پەتاو دەردێكی كوشندەن، هەرچەندە زینا چەمكێكی ئاینیە, بەڵام بە شێوەیەكی گشتی بریتیە لە پەیوەندی سێكسی نێوان پیاو ژن یان كوڕو كچ لە دەرەوەی چوارچێوەی بازنەی هاوسەرگێریەتی كە پڕۆسەیەكە یەكێك لە پڕنسیبەكانی یاساو ئایین و داب و نەریت یان هەموویان دانی پێدا دەنێن و بڕیاری لە سەر دەدەن، ئەم كارەش كاتێك جێبەجێ دەبێت پێ دەوترێت زینا كە ئەندامی نێرینەی پیاو بچێتە ناو ئەندامی مێینەی ئافرەت، زینا كردنیش لە زۆربەی شارستانیەت و كۆمەڵگەكان ئەگەر گشتیش نەبووبێ بە جۆرێك لە جۆرەكان لە لای كۆمەڵێك خەڵكی هۆشیارو مرۆڤ دۆست قێزەوەن بووە و ڕەتكراوەتەوە، چونكە سروشتی مرۆڤ قبوولی بەرەڵای سێكسی ناكات، هەموومان دەزانینن كە زینا مەبەستە سەرەكیەكەی بریتیە لە تێركردنی ڕەمەك زایەندی ( غریزە جنسی)، بەڵام زۆر جار بە مەبەستی تری وەك پارە پەیدا كردن كە پێ ی دەوترێ لە شفرۆشی یان ئەتك كردنی یەكێك ئەنجام دەدرێ، چەند جۆرێك لە زیناكردنمان هەیە وەك زیناكردن بە ئارەزوو، بەزۆرەملێ، زینای منداڵ و مێر منداڵ، زینای كەسانی نزیكی خۆی (المحارم)، لە شفرۆشی، زینای نەزانی واتە كەسەكە وا دەزانی ئەوەی دەیكات شەرعی و یاسایە كەچی لە ڕاستیدا زینایە، بۆ نموونە یەكێك ژنەكەی تەڵاق دەدات و ناشزانێ كە تەلاقەكەی كەوتووە و نابێ نزیكی بكەوێ یاخود یان ئەسڵەن بە پێ شەرع یان قانون مارەیان لێك نەهاتووە، بۆ نموونە مارەكردنی كچ بە منداڵی، ئەمانە بە زینا هەژمار دەكرێن، جۆرێكی دیكە لە جۆرەكانی زینا خیانەی هاوسەرەكانە، ئەمەش یەكێك لە هاوسەرەكان بە دزیەوە و لە پەنای ئەوەكەی تر دەست تێكەڵ دەكات لە گەڵ كەسێكی دیكە، ئەوەی جێگەی باس كردنە لە نێو میللەتی كورد بە درێژای مێژوو ئەوەی كە مابێتەوە زینا بە چاوێكی سووكەوە سەیر كراوە و قێزەوەن بووە، بەردەوام كەسی زینا كار بەر نەفرەت و رق و قینەی كۆمەڵگە كەوتووە، لە هەمان كاتدا زینا دەرهاویشتە و بەرئەنجامی خەراپی دەبێت لە سەر كۆمەڵگە و خێزانەكان و كەسایەتیە زینا كارەكە، كاریگەری دەبێت لە سەر خوودی خێزان وەكو دروست بوونی تەڵاق و هەڵوەشانەوەی خێزان و لێكترازانی ئەندامانی، سەر كێشانی بۆ كوشتن و لە دەستدانی هاوسەنگی دەروونی و سۆزداری و متمانە لە نێوان هەردوو هاوسەر و پەرتەوازە بوون و بێ سەرپەرشتی بوونی منداڵەكان، جگە لەمە كاریگەری بۆ سەر كۆمەڵگەش دەبێت وەكو دروست بوونی فەوزای ڕەوشت و ئاكار لە كۆمەڵگەدا ئەگەر بڵاو بێتەوە، لە یەك هەڵوەشانی سیستەمەكانی كۆمەڵگە و بە هۆی تێكچوونی شیرازەی خێزانەوە و تێكچوون و شێوانی كەسایەتی تاك بە تایبەتی مندڵەكان، بەڵام ئەوەی جێگەی باسە پێویستە بزانین هۆكاری دروست بوونی ناپاكی هاوسەریەتی چیە كەچی بەداخەوە گەورەترین گرفت كە كۆمەڵگە تێی كەوتووە ئەو ناپاكیە هاوسەریەتیە كە لە نێوان یەكێك لە هاوسەرەكان یان هەردووكیان ڕوو دەدات، من پێم وایە یەكێك لە هۆكارەكانی ناپاكی هاوسەریەتی پابەند نەبوونێكی ڕاستەقینە و تەواو بە ئاینی پیرۆزی ئیسلام، ئینجا هۆكاری تریش زۆرن وەك خۆ پشتگوێ خستن و بایەخ نەدانی ئافرەت بە جوانی و ڕازاوەی خۆی، بێزاربوون و هارەسان بوون لە ڕۆتین و دووبارەبوونەوە لە ژیاندا بە تایبەتی بۆ پیاوەكە، زیاتر بایەخ دانی ئافرەت بە منداڵەكان و نە پرژانە سەر پیاوەكەی و پشتگوێ خستنی لە ڕووی سۆزو خۆشەویستیەوە، زۆربوونی جیاوازیەكانی نێوان هەردوو هاوسەر بە تایبەتی لە ڕووی ڕۆشنبیری و پلەی زانستی و تەمەن و جوانیەوە و بەختەوەر نەبوون لە گەڵ یەكتری، كێشەی جنسیەكان جا ساردی بێ یان كەموكوڕی یەك لە هەردووكیان كە دەبێتە تێر نەبوون لە جنسدا، زێدە ڕۆی لە تێكەڵ بوونی نا شەرعی لە گەڵ بێگانەكاندا لە كارو بۆنەكاندا، هەروەها برادەر و دۆستی خراپ لە هەردوو ڕەگەزدا هاندەرن بۆ ئەنجامدانی خیانەت، ئەمە و چەندین هۆكاریتر هەیە كە دەبێتە هۆی ئەوەی ناپاكی هاوسەریەتی لە كۆمەڵگەی ئێمەدا پەرەی بسێنێت, بەڵام بە بیروباوەڕی كۆمەڵناسان نەبوونی خۆشەویستی ڕاستەقینە و هەست و سۆز لە نێوان هاوسەرەكان ئەگەرێكە بۆ ئەوەی ناپاكی هاوسەرگیری ڕوو بدات.