Share on facebook
خاوی هێلی ئینتەرنێتی فاست لینك ناڕەزای هاووڵاتیانی لێكەوتۆتەوە
پێنج شەممە, 07 شوبات 2019 07:49


محەمەد باڵەك – سۆران :

هاووڵاتییان و بەكارهێنەرانی ئینتەرنێتی فاست لینك لە دەڤەری سۆران نیگەرانی خۆیان دەردەبڕن لەبەرامبەر خاوی هێلەكە و لە رێگەی زاری كرمانجی داوای رێگە چارەیەك دەكەن .

فاست لینك خزمەتگوزاریێكی هێڵی ئینتەرنێتی نەوەی چوارەمەو لە مانگی حوزەیرانی ساڵی 2017 دامەزراوە، بەقسەی بەكارهێنەرانی ئەم هێڵە لە سەرەتای وەگەڕ خستنی هێڵكی باش و بێكەشە و خێرا بوو تەنانەت هیچ هێڵێك نەی ئەتوانی كێبركێی لەگەڵ دا بكات، بەڵام لە ئێستادا ئەم هێڵە تەواو خاوەو وەك پێویست ناتوانرێ‌ سوودی لێوەر بگیردرێت‌و خەڵكیش وەك نارازی بوونێك بەرامبەر بەو هێلە سیمكارت و ئامێرەكانیان دەشكێنن، زاری كرمانجی لە ڕاپۆرتێكدا بەكار هێنەرانی ئەم هێڵە دەهێنێتە دووان ‌و ئەوان لەرێگای زاری كرمانجی داوای چارەسەركردنی ئەم ئاریشەیە دەكەن.

بەختیار عوسمان گەنجێكی دانیشتوی گەرەكی زانیاری شاری سۆانە بە زاری كرمانجی گووت " لەسەرەتادا هێڵی ئینتەرنێتی فاست لینك زۆر باش بوو، كاتێ‌ فاستلینك هات ئێمە گیرمان خواردبوو بەدەست هێڵە خراپەكانی ئینتەرنێت، بۆیە هەر زوو دەستپێشخەریمان كرد و لەگەڵ چەند هاوڕێیەك ئامێری بەكارهێنانی فاستلینگمان كڕی، بەڵام بەداخەوە ئەم كۆمپانیاییە وەك باقی كۆمپانیاكانی تر بێ‌ باك دەرچوو و ئەویش وەك هێڵەكانی تر خاو بوو و خەریكە متمانەمان پێ نامێێت .

زیاتر گووتی " ئەوەی جێگەی نیگەرانی ئێمەیە، لە هەرێمی كوردستان هیچ لێپێچینەوە لەگەڵ ئەم كۆمپانیایانە ناكرێت و كەس خۆی بەخاوەنی ئەم جۆرە ئاریشانە نازانێ‌، لەئێستادا هێڵی فاستلینك زۆر خراپەو وەك پێویست نییە، ئەمە جگەلەوەی بەڵانسی حسابەكانیشمان بەبێ‌ بەكارهێنان كەم دەكات و لەژێرەوە پارەكانمان ئەبات بەبێ‌ ئەوەی بەكاری بهێنین".

زانیار وشیار گەنجێكی تری شاری سۆرانە ئەو زۆر دڵپڕە لە هێلی ئینتەرنێت و بۆ زاری كرمانجی دەڵێ " ئەم جۆرە كۆمپانیایانە تەنها بازرگانی بە گیرفانەكانمان دەكەن، لەئێستادا هەبوونی فاست لینك و نەبوونی وەك یەكە، چونكە لەكاركردندا زۆر خراپە و هەندێك جار تەنانەت وێنەكانی نێو تۆڕەكۆمەڵایەتیەكانیش ناكاتەوە و رۆژ دووای رۆژیش خراپترە، هیچ كەسیش نازانێ‌ هۆكار چیەو كێ‌ لێی بەرپرسە، بۆیە لە رێگەی زاری كرمانجی داوا لە لایەنی پەیوەندی دار دەكەین هەر چی زوە هەوڵ بدرێت كێشەی ئەم هێڵە چاك بكرێت، یاخود رێگا بدرێت هێلێكی تری ئەنتەرنێتی " مای فای " دابنرێت، چونكە جگە لە فاستلینك هیچ هێڵی تری مای فای لەم سنورە نییە، ئەگەر بێت و هێڵێكی تر هەبێت ئەوا كێبركێ دەكەن لە پێشكەشكردنی باشترین خزمەتگوزاری".

شیرین مستەفا كچە قوتابیێكی دانیشتوی سۆرانەو سەبارەت بەخراپی ئەم هێڵە بۆ زاری كرمانجی گووتی" ئەمڕۆ لەهەمووان زیاتر ئێمەی قوتابی پێویستمان بە هێڵێكی باشی ئینتەرنێت هەیە، بۆ ڕایكردنی كارەكانمان، بەڵام بەداخەوە ئەم خاوییەی هێڵی فاست لینك ئێمەی نیگەران كردووە، ناتوانین وەكو پێویست سودی لێ ببینین و هیوادارین هێڵەكان چاك بكرێنەوە، چونكە ئێمە كارتەكان بە بڕە پارەیەكی باش دەكڕین كەچی زەرەرمەند دەبین".

پێشەڕەو سەردار گەنجێكی تەمەن 27 ساڵەی شاری سۆرانە بۆزاری كرمانجی گووتی" سەرباری ئەوەی ئەم هێڵە تابڵێی خراپەو وەك پێویست كار ناكات، لەهەمان كاتدا، دوای پڕ كردنەوەی بەڵانس بە یەك دوو ڕۆژ ئەبینی سەدا سی ڕۆیشتوە، و بەڵانسی زیاتر دەبەن لە بەكارهێنان ئەمە جگە لەوەی ئیشتراكی مانگانە هەیە لەمەشیان فێڵ لە بەكار هێنەران دەكرێت‌و كاتێ‌ 39000 دینار داخڵ ئەكەیت، كەمتر لە مانگێك كار دەكات، كاتێكیش پەیوەندی بەڕاژەی بەژدار بووان ئەو هێڵە دەكەین، قەرزار باریشت ئەكەنەوە.

دووپاتی كردەوە، پێویستە وەزارەتی گواستنەوە چیتر نەهێڵن ئەم كۆمپانییانە بازرگانی بكەن لەسەر حسابی گیرفانمان و سنورێكیان بۆ دابنرێت،جێی خۆیەتی هەر كۆمپانیایێك كەموكوڕی لەهێڵەكەی دروست بێت سزا بدرێن‌و هێڵەكانیان دابخرێن".

خاوی ئینتەرنێتی فاست لینك تەنها نێو سۆرانی نەگرتۆتەوە، بەڵكو لە ناحیەی سیدەكان و دەوربەری سۆرانیش خاوی بەخۆیەوە بینیوە و ئەمەش بەگشتی بەكارهێنەرانی ئەو هێڵەی نیگەران كردوە.

شایەنی باسە، فاستلینك چەند كارتێكی جۆرا و جۆری لە بازاڕەكان بڵاو كردۆتەوە، كە پێكدێت لە كارتی 15 هەزاری و 39 هەزاری .

بەمەبەستی وەرگرتنی زانیاری لەسەر خاوی ئینتەرنێتی فاست لینك، زاری كرمانجی چەندین پەیوەندی كرد بە بەرپرسانی ئەو كۆمپانیایە، بەڵام بە بیانووی جیا جیا ئامادەی لێدوان و قسە كردن نەبوون .