Share on facebook
بوونی پەكەكە یەكێك لە هۆكارەكانە بۆ چۆڵ بوونی گوندەكان
دووشەممە, 11 شوبات 2019 09:35

بەرێوەبەری ناحیەی قەسرێ :

قەسرێ تاپۆی نیە و هەر شوێنێك كە هی خەڵك نەبێت موڵكی وەزارەتی داراییە

چاوپێكەوتن- ڕائیب شێروانی

شاخەوان حوسێن، بەرێوەبەری ناحیەی قەسرێ لە چاوپێكەوتنێكدا لەگەڵ هەفتەنامەی زاری كرمانجی دیاركرد، ناحیەی قەسرێ، تاپۆی نیە، هەر شوێنێك كە هی خەڵك نەبێت، ئەوە موڵكی وەزارەتی داراییە، ئەوەش گرفتێكی یەكجار زۆری بۆ دانیشتووان و یەكەی كارگێڕی دروست كردووە، بەتایبەتی شارەوانی كە ناتوانێت بەشێوەیەكی باش خزمەتگوزاری پێشكەش بكات. دەشڵێ، لە قەسرێ ئەوە بۆ پێنج ساڵ دەبێت كەمترین پرۆژەی خزمەتگوزاری لێ جێبەجێ كراوە، ئەمە لە كاتێكدایە كە لە زۆربەی سێكتەرەكان كێشەمان هەیە و پێویستمان بە پرۆژەی خزمەتگوزاری هەیە.

بەرێوەبەری ناحیەی قەسرێ دەڵێ:" ناحیەی قەسرێ لەرووی كارگێڕییەوە سەر بە قەزای چۆمانە، دوو ڕای جیاواز لەسەر ناویان هەیە یەكەمیان ئەوەیە كە ناوی قەسرێ لە قەسرینەوە هاتووە، بە مانای شوێنێكی زۆر سارد، دووەمیان ئەوەیە كە دوو برا لەو ناوچەیە نیشتەجێ بوونە، بەناوەكانی خەسرەو ساكۆت، بەپێی ڕۆژگار ناوەكانیان گۆڕدراوە، لە ساڵی 1914 قەسرێ تەنیا 5 ماڵی لێ بووە، گوندێك بووە سەر بەناحیەی باڵەك و قەزای رواندز، بەڵام لەگەڵ هەڵگیرسانی شۆڕشی ئەیلوول كە ئەو ناوچەیە مەڵبەندێكی گرنگی شۆڕش بووە، لە دوای ڕاپەڕینی ساڵی 1991 جارێكی دیكە ئەو ناوچەیە ئاوەدان كراوەتەوە، بەهۆی فراوانی ناوچەكە لەسەردەمی كابینەی پێنجەمی حكوومەتی هەرێمی كوردستان، بە فەرمانی سەرۆكایەتی هەرێم ژمارە 130، لە 5/11/ 2007 كراوەتە ناحیە، ئێستا قەسرێ لە سەنتەری ناحیە و 36 گوند پێك دێت، ژمارەیەك بنكە و فەرمانگەی حكوومی لە قەسرێ هەنە و رۆژانە كاروباری هاووڵاتیان ڕادەپەڕێنن، ژمارەی دانیشتووان لە ئێستادا نزیكەی 11 هەزار كەس دەبن، قەسرێ ناوچەیەكی كشتوكاڵی و گەشتوگوزارییە، لەرووی بەكارهێنانیەوە زۆربەی خەڵكەكەی بە كاری كشتوكاڵی و بەخێوكردنی ئاژەڵ و هەنگ خەریكن، رووبەری گشتی ناحیەی قەسرێ، 177 هەزار و 34 كیلۆمەتر دووجایە، پێكهاتەی دانیشتووانی هەموو كورد و موسڵمانن.

شاخەوان حوسێن، دەشڵێ:" لە ئێستادا هەندێك گوند چۆڵ بوونە و تەنیا بە هاوینان زیاتر ئاوەدان دەكرێنەوە، واتە خەڵكەكەی زیاتر كوێستان و گەرمیان دەكەن، تەنیا بە هاوینان بۆ كاری كشتوكاڵی روو لە گوندەكانیان دەكەن، هەروەها بەهۆی بۆردومانی فڕۆكەكانی توركیا هەندێك گوند ئارەزووی نێشتەجێ بوونیان تێدا كەم بۆتەوە، بۆیە بوونی پەكەكە و بۆردومانی توركیا یەكێك لە هۆكارەكانە بۆ چۆڵ بوونی ئەو گوندانە.

شاخەوان حوسێن، بەرێوەبەری ناحیەی قەسرێ گوتیشی:" ناحیەی قەسرێ، تاپۆی نیە، هەر شوێنێك كە هی خەڵك نەبێت، ئەوە موڵكی وەزارەتی داراییە، ئەوەش گرفتێكی یەكجار زۆری بۆ دانیشتووان و یەكەی كارگێڕی دروست كردووە، بەتایبەتی شارەوانی كە ناتوانێت بەشێوەیەكی باش خزمەتگوزاری پێشكەش بكات، رێگریەكی باشمان كردووە لە دیاردەی زێدەرۆیی، بەڵام لەبەر ئەوەی نەخشەی بنەڕەتی نیە، ئەوەش كێشەیەكی هەرە گەورەیە بۆ ئێمە كە ناتوانین 100% رێگری لە زێدەڕۆیی بكەین، چونكە خەڵك ماوەیەكی زۆرە لەسەر ئەو زەویانەیە و ناتوانین هیچیان پێ بڵێین.

شاخەوان حوسێن، ئاماژەی بەوەش كرد:" ناحیەی قەسرێ ئەوە بۆ پێنج ساڵ دەبێت كەمترین پرۆژەی خزمەتگوزاری لێ جێبەجێ كراوە، ڕاستە پرۆژە هەبووە بەڵام بەم شێوەیە نەبووە، كە لە ئاست تموحی ئێمە بێت، چەندین ساڵە لەبەر قەیرانی دارایی ناتوانین پرۆژە وەكو پێویست جێبەجێ بكەین، یەكێك لە پرۆژە سەرەكییەكانی قەسرێ ئەوەیە كە تۆڕێكی باشی ئاوی خواردنەوەی نیە، كە وەكو پرۆژەی ستراتیژی بێت، كارەبا بە هەمان شێوە، رێگاوبانەكان پێویستیان بە نۆژەنكردنەوە هەیە، چەندین گەڕەكی نوێ دروستبوونە، پێویستیان بە قیر و ئاو و ئاوەڕۆ و ڕاكێشانی ئاوی خواردنەوە هەیە، ئەوانە هەموو پرۆژەی گرنگن و پێویستن بۆ قەسرێ، نەبوونی پارك، یاریگا، نەبوونی بنكەیەكی تەندروستی گەورە كە لە تموحی ژمارەی دانیشتوان بێت، ئەمانە هەموو كێشەنە لەناوچەكە و پێویستە ئەو پرۆژانە جێبەجێ بكرێن.

بەرێوەبەری ناحیەی قەسرێ زیاتر روونیكردەوە:"ئەو داواكارییانەی كە خەڵك ئاراستەی ئێمەی كردووە هەموومان كردوونەتە دەرخستە و بە نووسراو و ئاراستەی قایمقام و پارێزگای هەولێرمان كردووە، زۆر لە دەرخستەكان لە پلان دانراون و چەند پرۆژەیەكمان لەناوچەكە جێبەجێ كردوونە، بەردەوامیش دەبین لە جێبەجێ كردنی پرۆژە خزمەتگوزارییەكان و بەردەوامیش دەبین لە گەیاندنی داواكاریییەكانی خەڵك، بەڵام ئەوەش دەگەڕێتەوە بۆ پلانی حكوومەت، باشتربوونی بارودۆخی دارایی، تا چەند دەتوانین ئەو پرۆژانە ئەنجام بدەین.

شاخەوان حوسێن، بەرێوەبەری ناحیەی قەسرێ ئاشكراشی كرد:" بەهۆی ئەو لافاوەی كە بەو دوایە ناوچەكەی گرتەوە، ئەو زیانانەی بەر خەڵك كەوتووە، بەر پرۆژە خزمەتگوزارییەكان كەوتووە هەر هەموومان بە نووسراو ئاراستەی قایمقام، پارێزگار و سەرۆكایەتی حكوومەت كردووە، بەڵام تا ئێستا تەنیا خاوێن كردنەوەی رێگاوبانەكان و گەیاندنی ئاوی خواردنەوە بۆ ماڵان، جا چ بە شێوەی بۆڕی بێت، یان تانكەر، لەگەڵ گەیاندنی توڕی كارەبا بۆ ئەو شوێنانەی كە بەر لافاو كەوتوونە كراوە، وەكو رێگاوبانەكان و پرد نەكەوتوونەتە بواری جێبەجێ كردنەوە، ئەوەش پێویستی بە بودجەیەكی زۆر باش هەیە كە بە 6 ملیار دینار دەخەملێنرێن، هەروەها ئەو زیانانەی كە بەر خەڵك كەوتووە جا بە هەر شێوەیەك بێت و هەر شتێكی ئەو خەڵكە زیانی بەر كەوت بێت بە نووسراو هەموومان ئاراستەی پارێزگای هەولێر كردووە".