Share on facebook
" شارەوانی سیدەكان بستێك زەوی تایبەت بەخۆی نییە ! "
دووشەممە, 11 شوبات 2019 09:41

 

سەرۆكی شارەوانی سیدەكان :

سەرجەم شەقامی گەڕەك و كۆڵانەكانی سیدەكان  وێرانن

موڕشید برادۆستی – سیدەكان : لە دیمانەیەكی زاری كرمانجیدا، عەبدولقادر ئەكڕەم سەرۆكی شارەوانی سیدەكان باس لە كێشە و گرفتە خزمەت گوزاریەكانی سنوورەكە دەكات و دەڵێ " سیدەكان بەبێ سەر و بەری گەورە بووە و زۆربەی گەڕەكەكان بەبێ ئەندازەی دروست بوونە و تا ئێستا ئاو و ئاوەڕۆی سەرەكی نییە، ئاشكراشی دەكات " ئەمساڵ چەند پڕۆژەیەكی نوێ لە سیدەكان جێبەجێ دەكرێن كە جێگەی رەزامەندی دانیشتوان دەبێت .

لە دەستپێكی قسەكانیدا، عەبدولقادر ئەكڕەم بۆ زاری كرمانجی گووتی " 12 گەڕەكی سنووری شارەوانیمان هەیە و بەڵام نەتوانراوە تابلۆ بۆ هەموو گەڕەكەكان دروست بكرێت، گەڕەكەكانیش پێك هاتوون لە گەڕەكی " فەرمانبەران، گوڵان ، راپەڕین ، ئازادی ، سیدەكانی كۆن ، سەربیش و چەند گەڕەكێكی تر ... نزیكەی هەزار ماڵ لە سەنتەری ناحیە دەژین و بەسەر ئەو گەڕەكانە دابەش بوونە، بەڵام هەموو گەڕەكەكان ناو و تابلۆی خۆیان نییە، بۆیە بە هەماهەنگی لەگەڵ بەڕێوەبەرایەتی ناحیە لە پلانماندا ناوی گەڕەك و شەقامەكان دیاری بكەین، تابلۆشیان بۆ بۆ دابنێین و بەشێوازی جوان ناوی گەڕەكەكان بنووسین و هەڵبواسین، لە داهاتووەكی نزیك ئەو كارە ئەنجام بدەین .

سەرۆك شارەوانی سیدەكان ئاشكرای دەكات " هەموو گەڕەكەكانی سیدەكان پێویستیان بە پێشكەش كردنی خزمەت گوزاری هەیە، چونكە سیدەكان لە ماوەیەكی زۆر كەمدا فراوان و گەورەبوونی بەخۆیەوە بینی، رێژەیەكی زۆری هاووڵاتییان لە گوندەكانەوە روویان لە سیدەكان كرد،  بەو هۆیەوە بە بێ سەر وبەری و بەبێ ئەندازەی گەڕەكەكان دروست بوونە و خەلك ئەوكات دەستدرێژی زۆری كردوە بۆ سەر مولكی گشتی و شەقامەكان و چەندین ماڵ هەیە ستوونی كارەبای لە نێو حەوشەیەتی، ئێستە كێشەی زۆر بۆ ئێمە دروست بووە و بە ئاسانی ناتوانین ئیش لەو گەڕەكانە بكەین، كێشەی سەرەكی ئەو گەڕەكانەش نەبوونی ئاو و ئاوەڕۆیەكی سەرەكییە، سەرباری ئەمە شەقامی گەڕەك و كۆڵانەكانی سیدەكان وێرانن و سەرجەمیان پێویستیان بە قیڕتاو كردن هەیە . بۆیە بەمەبەستی چاڕەسەر كردنی كێشەی ئاوەڕۆ، دەرخەستەیەكمان ئامادەكردوە لە گوندی بنی ماڵەدەر تاكو گەڕەكی فەرمانبەری خواروو، ئاوەڕۆیەكە بەشێوەیەكی سندووقی دروست دەكەین، بڵاوبوونەوەی بۆن و ئاوی پیس نەبوونی ئاوەڕۆیەكی سندووقییە .

زیاتر گووتی " بەشێوەیەكی گشتی بۆ سیدەكان پڕۆژەی خزمەت گوزاری جێبەجێ كراون، بەڵام لە تموحی خەڵكدا نەبووە، دەڤەری برادۆست قوربانی زۆری داوە بۆ ئەو ئازادیەی ئێستا لە كوردستان هەیە، پێویست بوو زیاتر گرنگی پێبدرێت، لە دووای 2011 تا  ئێستا ئەوەی بۆ سیدەكان كراوە جیا لە تەواو كردنی دووساید كە پڕۆژەیەكی ستراتیژی گرنگ بوو، هاوكات پڕۆژەی دروست كردنی نەخۆشخانەیەكی 24 قەلەوێری و باڵەخانەی بانك و دروست كردنی رێگای سەرەكی دۆڵی زەرزێ كە ئەوانیش بەهۆی قەیرانی دارایی تەواو نەكراون .

لە بەردەوامی قسەكانیدا، سەرۆكی شارەوانی سیدەكان گووتی " وەكو شارەوانی سیدەكان چەند رۆژێك لەمەوبەر لەگەڵ لیژنەیەكی ئەنجومەنی وەزیران كۆبووینەوە و چەند داواكاریەكمان ئاڕاستە كردن كە ئەگەری زۆر هەیە، ئەویش قیڕتاوكردنی شەقام و كۆڵانەكانی سیدەكان، هەروەها دروست كردنی پاڕكێكی خنجیلانەی مۆدێرن، لەهەمان كات دروست كردنی پردێكی ستاندەر بۆ نێوان سیدەكانی كۆن – كەلەك لە سنووری شارەوانیمان .

لەبارەی وەرگرتنی رەزامەندی بۆ چاككردنی چەند گەڕەكێكی سیدەكان، عەبدولقادر ئەكڕەم ئاشكرای كرد " نزیكەی حەوت مانگە وەك سەرۆكی شارەوانی سیدەكان دەست بەكار بووم، خۆشبەختانە لەو ماوە كەمەدا توانیم رەزامەندی وەرگرتنی 365 ملیۆن دینارم بۆ پڕۆژە خزمەت گوزاریەكان لە حكومەت وەرگرت، بەر لە هەموو كارێك خەلكی سیدەكان و گوندەكانمان لە كێشە و گرفتی دووساید رزگار كرد و ئەو سایدەی كە تەواو نەكرابوو توانیمان قیڕتاوی بكەین، جیا لەوەش تێكەڵە رێژكردن و چاككردنی چەند گەڕەكێكی وەك ئازادی، دوو كۆڵانی گەڕەكی فەرمانبەران و بەشێكی دەروازەی گوڵان هەروەها دورست كردنی ئاوەڕۆ بۆ ئەو گەڕەكە .

سەرۆكی شارەوانی سیدەكان لە بارەی خراپی و تەواو نەكردنی رێگای سەرەكی گەڕەكی فەرمانبەران دەڵێت " ئەو رێگایە كە رێگەیەكی سەرەكییە، چەند ساڵێك لەمەوبەر لەلایەن یەكێك لە كۆمپانیا و بەڵێندەرەكان بە كۆنكرێت دروست كرا، بەهۆی جێبەجێ نەكردنی پڕۆژەكە بەشێوەیەكی ئەندازەی و باش، پڕۆژەكە وەرنەگیرا و بەوهۆیەوە تەواو نەكرا و بەنیوەروانی  ماویەوە، كۆمپانیا و بەڵێندەرەكەش خرانە لیستی رەش و دەست بەسەر پارەكەشی داگیرا و نزیكەی 148 ملیۆن دینار ماوە وەربگیرێت، ئێمە وەك شارەوانی پارێزەرێكمان بۆ ئەم مەبەستە گرتووە و تا كێشەكە لە دادگا لە نێوان كۆمپانیا و حكومەت تەمیز دەكرێتەوە، هەر كاتێك یەكلای بووەوە دەتوانین چارەسەرێك بۆ ئەو رێگایە بدۆزینەوە بەپێچەوانەوە لە ئێستەدا ناتوانین دەستكاری رێگاكە بكەین .

دەربارەی ئەوەی بۆچی  رێگای شەقام و كۆڵانەكانی سیدەكان ئەگەر توانای قیڕتاو كردنیش نییە تێكەڵڕێژی ناكەن، ئەو بەرپرسەی حكومەت لە سیدەكان گووتی " هەرچەندە سەرجەم گەڕەكەكان پێویستیان بە چاككردنی رێگاكانیان هەیە، بەڵام تێكەڵڕێژكردنی شەقام و كۆڵانەكان چارەسەری كۆتای نییە و چارەسەرێكی كاتییە، بەفیڕۆدانی پارەیە چونكە دواجار تێكەڵەڕێژیەكە بەبێ قیڕ و سەبە تێكدەچێت، بۆیە هەوڵی قیڕتاوكردنییان دەدەین .

ناوبراو لەبارەی گەڕەكی سەربیش روونی دەكاتەوە" گەڕەكی سەربیش كە ماوەی چەند ساڵێكە دروست بووە و گەڕەكێكی نوێی سیدەكانە، دووای ئەوەی رەزامەندی بڕە پارەیەكمان وەرگرت بۆ چاككردنی بەشێكی گەڕەكەكانی سیدەكان، بەنیاز بووین شەقام و كۆڵانەكانی گەڕەكەكە بكەینەوە و كاری تێكەڵەڕێژی بۆ بكەین، بەڵام دانیشتوانی سەربیش بەوە رازی نەبوون و رێگر بوون، ئەوان داوای چاككردنی شەقامەكانیان كرد بە یەكجاری واتە دەیان ویست رێگاكانیان بۆ قیڕتاو بكرێت و ئاو و ئاوەڕۆیان بۆ بكرێت تەنها تێكەڵەڕێژ نەبێت، بۆیە ئێمە وەكو سەرۆكایەتی شارەوانی سیدەكان دەرخەستەیەكمان ئامادە كردوە بۆ ئەو گەڕەكە و هەوڵی تەواو دەدەین ئەمساڵ خزمەت گوزاریەكانیان پێ بگەینین .

عەبدولقادر ئەكڕەم روونی دەكاتەوە، ئەگەر بێتوو هەموو كێشە و گرفتەكانی سیدەكان لە رووی خزمەت گوزاریەوە چاك بكرێن، بەگشتی كێشەی خزمەت گوزاری وەك قیڕتاوكردنی گەڕەك و كۆڵانەكان و ئاو و ئاوەڕۆی سەرەكی، پێویستیمان بە یەك ملیار دینار هەیە و دەتوانین بەو بڕە پارەیە سیدەكان ئاوەدان بكەینەوە و كێشە و گرفتەكانیش چارەسەر بكەین .

دووپاتی كردەوە، ناحیەی سیدەكان لە لە بوددجەی پارێزگاكانیش بێبەش كراوە، ماوەیەك بەر لە ئێستا بۆ ئەم مەبەستە سەردانی پارێزگای هەولێرمان كرد و ئەو نیگەرانیەمان ئاڕاستە كردن كە ماوەی چەند ساڵێكە یەك دیناری بووددجەی پەرەپێدانی پارێزگاكان بۆ سیدەكان نەهاتووە!، ئەوانیش پشتگیری قسەی ئێمەیان كرد و داوایان كرد دەرخەستەیەكیان پێ بدەین تا لە داهاتوو بڕە پارەیەك بۆ جێبەجێ كردنی پڕۆژەی خزمەت گوزاری لە سیدەكان خەرج بكەن، بۆیە ئێمەش دەرخەستەیەكمان ئامادە كردوە كە خۆی دەبینێتەو لە قیڕتاو كردنی رێگایەكی سەرەكی لە نزیك هێزی سیدەكان تا گوندی ماڵەدەر  كبرستۆن و قیڕ بكرێت لە هەمان كات ئاوەڕۆشی بۆ چاك بكرێت، ئومێدەوارم ئەو بڕە پارەیەمان بۆ دابین بكرێت .

دەربارەی رێكسختنەوەی بازاڕی سیدەكان، سەرۆكی شارەوانی گووتی " بەدڵنیایەوە نێو بازاڕی سیدەكان رێك نیە و بێسەر و بەری پێوەدیارە، ئەمەش سیمایەكی جوانی نەبەخشیوە، بۆیە دووای ئەوەی پڕۆژەی دووسایدی سەنتەری سیدەكانمان تەواو كرد، لە ماوەیەكی نزیك دەست دەكەین بە رێخستنەوەی بازاڕ و یەكەم قۆناغی رێكسختنەوەكەش گواستنەوەی پیشەوەرانە بۆ پشت بازاڕ و لەوێ شوێنیكان بۆ دروست دەكەین، بەتایبەت ئەوانەی كاری چاككردنەوەی ئۆتۆمبێل و روون گۆڕ و ئاسنەگەرەكان و ئەوانەی كاری دروست كردنی دەرگا و پەنجەر P V C ی دەكەن، بۆ ئەم مەبەستەش كۆبوونەوەیەكەمان لەگەڵیان كردوە و ئەوانیش هاوكاری خۆیان دەربڕیوە .  لەهەمان كات لە نێو بازاڕ شوێنی عەیادەی و تاقیگە و ئەوانەی كاری پزیشكی دەكەن دیاری دەكەن و دەبێت لەیەك شوێن و لە نزیك یەكتر كاری خۆیان بكەن ، هەروەها ئەوانەی كاری كوشتنەوەی ئاژەڵ و فرۆشتنی گۆشت دەكەن پلانمان بۆ ئەوانیش هەیە و رێكیان دەخەینەوە، بەڵام جێگەی داخە شارەوانی سیدەكان بستێك زەوی تایبەت بەخۆی نییە و هیچ داهاتێكیشی نییە، ئەمەش كێشەی زۆری بۆ ئێمە دروست كردوە .

عەبدولقادر ئەكڕەم سەرۆكی شارەوانی سیدەكان لە كۆتای قسەكانیدا ئاشكرای كرد " لە ماوەی ساڵانی رابردوو دەست درێژی زۆر بۆ سەر مولكی گشتی كراوە لە سیدەكان و ئەوە ناشارینەوە بەشێوەیەك لە شێوەكان ئەوە كراوە، بەڵام لە زۆربەی شوێنەكانی تریش كاتی خۆی دەست درێژی بۆ مولكی گشتی هەبووە، بەڵام دووای دەست بەكار بوونم رێگریم كردوە .