Share on facebook
خەسرۆ ئیسماعیل لەسەر كێشەكانی تاپۆ كردن دەدوێت
دووشەممە, 11 شوبات 2019 09:51

بەڕێوەبەری تۆماری خانووبەرەی سۆران:

لەدوو شارۆچكەو چەند شارەدێیەكی سنورەكەمان تائێستا یەك خانووی هاووڵاتیان تاپۆ نەكراوە

بەڕێوەبەری تۆماری خانووبەرەی سۆران، كێشەو بەربەستەكانی بەردەم تۆمار كردنی خانوو زەووی هاووڵاتیانی دەڤەری سۆران ئاشكرا دەكات و دەشڵێت "تائێستا لە دوو شارۆچكەو چەند شارەدێیەكی سنورەەكەمان، یەك خانوو زەووی بەناوی هاووڵاتیان تۆمار نەكراوە، ئەوەش گرفتی بۆ خەڵكەكەو حكومەتیش دروست كردووە.

لەبەردەوامی قسەكانیدا خەسرۆ ئیسماعیل، بەڕێوەبەری تۆماری خانووبەرەی سۆران، رایدەگێنێت: "سنوری بەڕێوەبەرایەتیەكەمان هەرچوار قەزاكانی (سۆران، رواندز، چۆمان، مێرگەسۆر) لە خۆدەگرێت، وەك ئاسانكاریەكیش بۆ هاووڵاتیان لە هەردوو شارۆچكەی چۆمان و رواندز، تێبینەرایەتی تۆماری خانووبەرە كراوەتەوە، بەڵام تائێستا سنوری قەزای مێرگەسۆر، تێبینەرایەتی تۆماری خانووبەرەی نییە، بەشێوەیەكی گشتیش تۆمار كردنی خانوو زەووی هاووڵاتیان وەك پێویست نییە، بۆ نموونە لە شاری سۆران و دیانا تەنها نەخشەی چەند كەرتێك كاری تۆماركردنی لەسەر دەكرێت، كە ئەوانیش تا ئێستا نەكەوتوونە بواری جێ بەجێ كردنەوە لەبەر چەند هۆكارێكی هونەری، چەندین گەڕەك تائێستا بێ‌ تاپۆن، كاری تۆماركردنیان لەسەر نەكراوە، تەنانەت لەزۆربەی شارەدێی و چەند شارۆچكەیەكی دەڤەرەكەشمان تائێستا خانوو زەووی هاووڵاتیان تۆمار نەكراون".

بەڕێوەبەری تۆماری خانووبەرەی سۆران، دەشڵێت "هۆكاری نەبوونی خانوو زەوی تۆمار نەكراو واتە نەبوونی (تاپۆ) لەقەزاكانی مێرگەسۆر و بەشێك لەناحیەو گوندەكانی  قەزای چۆمان و ڕواندز و سۆران، بۆ بڕیارێكی سەردەمی بەعس دەگەڕێتەوە، كە زەویەكان تەسویە نەكراون لەبەر هۆكاری سیاسی، كە بەپێی یاسایی ژمارە (90) لەساڵی 1975 موڵكەكانیان بونەتە میری، بەمەش خەڵكەكەی بونەتە قوربانی بڕیاری رژێمی بەعسی لەناوچوو، كە هەم گرفت بۆ هاووڵاتیان دروست بووە، هەمیش بۆ حكومەت".

لەبەشێكی دیكەی ئاخاوتنەكەیدا خەسرۆ ئیسماعیل، ئاشكرای دەكات "بۆ چارەسەری گرفتی ئەم موڵكانەی ئەم شارو شارۆچكانەی دەڤەرەكە پەرلەمانی كوردستان یاسایی ژمارە (32)ی لەساڵی 2007 دەركرد، بۆ هەموار كردنەوەی یاسای (90)ی ساڵی 1975 بەڵام تاكو ئێستا لیژنەی چەسپاندنی خاوەندارێتی لە بەڕێوەبەرایەتی گشتی  كشتوكاڵ، بۆ ئەم سنورانە دەست بەكار نەبوونە، تا كێشەی موڵكەكان چارەسەر بكرێن و یەكلایی بكرێنەوە، هیوادارین لەداهاتوودا كاری جددی لەسەر ئەم باتە بكرێت، چونكە بەداخەوە ماوەی دوانزە ساڵی بەسەر داچووە".

خەسرۆ ئیسماعیل، بەڕێوەبەری تۆماری خانووبەرەی سۆران، گووتیشی "لە ساڵی 2009 بڕیاری تەملیك كردنی زەوی خانوو لە سنوری شارەوانی سۆران دەرچوو كە لە ڕێگای لێژنەی باڵای تەملیك كردن لە سۆران ئەنجام دەدرا، بەڵام لە دوای ساڵی 2015 بڕیاری تاپۆكردن گۆڕانكاری بەسەرداهات و سەرۆكایەتی دیوانی ئەنجوومەنی وەزیرانی حكومەتی هەرێمی كوردستان، بڕیارێكی دەركرد، كە لە سنوری شارەوانی سۆران، هەموو تۆماركردنی زەووی و خانوو رابگیرێت، تەنها كار لەسەر نەخشەی (16) و (46) بكرێت، ئەوەش تەنها چەند گەڕەكێك دەگرێتەوە، واتە تاكوو ئەم دوو نەخشەیە تەواو نەبێت، كار لەسەر گەڕەكەكانی دیكە نەكرێت، ئەوەش گرفتی بۆ دروست كردوین و ناتوانین لە شوێن و گەڕەكەكانی دیكە خانوو زەووی هاووڵاتیان تۆمار بكەین".

بەڕێوەبەری تۆماری خانووبەرەی سۆران، ئەوەش دەخاتەروو "بۆ سنوری شارەوانی رواندز، بڕیاری تاپۆكردنی كردنی خانوو زەووی هاووڵاتیان دەرچووە، بەڵام تائێستا نەخشەكانیان تەواو نەبووەو كاریان لەسەر دەكرێت، هەروەها لەسەنتەری شارۆچكەی چۆمانیش تەنها موڵكە كشتوكاڵیەكان تاپۆكراون، خانوو زەوی هیچ هاووڵاتیەك تاپۆ نەكراوە، پێویستە شارەوانی چۆمان هەوڵی جددی بدات، بۆ دانانی نەخشەی بنەڕەتی و نەخشەی كەرتی، بۆ مەبەستی تاپۆكردنی خانووی ئەم هاووڵاتیانەی كەوتونەتە ناو سەنتەری شارەوانی، ئەوەی لەهەمووشیان زیاتر گرفتی تاپۆی هەیە سنوری شاردێی مێرگەسۆرە، كە نە زووی كشتوكاڵی نە هیچ موڵكێك و خانووی هاووڵاتیان تاپۆیان نییە".

لە دوا قسەكانیدا خەسرۆ ئیسماعیل، ئاماژەی بەوەدا "ئەم زەویانەی لە كەرتی دێڵزیان بەسەر خاوەن قەرەبوو و چین و توێژەكان دابەش كراون، پێویستیان بە چەسپاندنی سنور هەیەو خزمەتگوزاری بۆ بچێت، بۆ ئەوەی خەڵك بتوانێت لە رێگەی بەڕێوەبەرایەتی تۆماری خانووبەرەی سۆران، زەویەكانیان بۆ دیاری بكرێت و بتوانن بۆ خۆیان بیان كەن بە خانوو، یان شوێنەكەیان دیاربێت، بەڵام بەداخەوە تائێستا جگەلە نەخشەی (25) و نەخشەی (4) ئەوانی دیكە دیاری نەكراون، ئەمەش گرفتێكی دیكەی سەرەكی خاوەن زەویەكانە.