Share on facebook
بازاڕی رۆمانی سێكسی گەرمە
یەک شەممە, 09 ئەیلول 2012 20:13

ZKW: جێگای سەرسوڕمان نەبوو بۆ ناوەندە رۆشنبیری ‌و چاپەمەنییەكانی ئەوڕوپا، كە رۆمانی (ناوچە هەستیارەكان) رۆمانی رۆماننوس (شارلۆتە رۆش)، وەك یەكێك لە پڕ فرۆشترین رۆمانەكان دەركەوێت، بەشێوەیەك كە زیاتر لە یەك ملیۆن دانەی تەنها لە یەك ساڵدا لێ فرۆشرا، دوای ئەوەی ئەم رۆمانە بەربەست ‌و سنوورە كۆمەڵایەتییەكان دەبەزێنێت ‌و زۆر بە روونی قسە لە بارەی ریزپەڕی ‌و ناوازەیی سێكسی دەكات، بە بەراورد بە رۆمانە سێكسییەكانی تر، كە لە ساڵانی پێشووتر نوسراون. رۆمانی (ناوچە هەستیارەكان)، شانبەشانی رۆمانێكی تر دێت، كە لەم دواییانە لەلایەن (ئەنیسە تەمسمانی) وەزیری دەست لەكاركێشاوەی بەلجیكا چاپكراوە، یەكەم كەسە بەرەگەز خەڵكی ئەوڕوپا نەبێت ‌و بچێتە پۆستێكی باڵا لە وڵات. ئەو لەگەڵ چاپكردنی رۆمانی ( ویتسترات)، ناوەندە سیاسی ‌و ئەدەبییەكانی بەلجیكای تووشی شۆك ‌و سەرسوڕمان كرد، چونكە رۆمانەكەی لە جیاتی ئەوەی لە بواری سیاسەت بێت، بواری سێكسی گرتۆتەوە. (ئەنیسە) لە رۆمانەكەیدا بە پشت بەستن بە خەیاڵ ‌و اقیع، چیڕۆكە سێكسییەكانی خۆی داڕشتوە. چاودێران وایدەبینن، كە رەنگ بێت ( ئەنیسە ) لە رێگای رۆمانەكەیەوە ئاماژە بەو پەیوەندییە روون ‌و ئاشكراییەی نێوان سێكس ‌و سیاسەت بكات.
نووسەری رۆمانی ناوچە هەستیارەكان
نووسەری رۆمانی (ناوچە هەستیارەكان)، كچێكی بەرەگەز ئەڵمانیە‌و تەمەنی سی ‌و یەك ساڵە، یەكێكە لە بەناوبانگترین پێشكەشكارانی پرۆگرامە كورتەكان لە تەلەفزیۆنی ئەڵمانی، بەگوێرەی رۆژنامەی (دوتج ویلە)ی ئەڵمانی، نووسەر لە رۆمانەكەیدا باسی هەموو ئەو لایەنە سێكسییانە دەكات، كە هەموو كەسێك بە ئاسانی ناتوانێت بیریشی لێبكاتەوە، لە رۆمانەكەیدا شەهوەتبازی ‌و غەریزە سێكسییەكانی بەشێوەیەكی قێزەوەن ‌و ناشرین وروژاندوە، لە رێگای جەستەی پاڵەوانی رۆمانەكە‌و ئەو كردە سێكسییانەی شەوان لەگەڵ عاشقانی جەستەیی ‌و راوكەرانی دەیكات، سەرەڕای ئەوەی توانیویەتی وەسفی ریزپەڕی سێكسی بكات ‌و بە كردەیەكی سێكسی ئاسایی بیبینێت، كە شەوانە لە سەر پێخەفی سێكسی ئەڵمانیا روودەدات، بێ‌ ئەوەی كەس لە خۆی راببینێت باسی لێوە بكات.  
رشانەوەی رۆژنامەنووسێك
ئەوەی سەیر‌وسەمەرەیە لە پاڵەوانی ئەو رۆمانە، بریتییە لە ئەنجامدانی سێكس بەتایبەت لە كاتی سووڕی مانگانە، لەگەڵ ئەوەی لە نەخۆشخانەی نەخۆشییەكانی كۆم كەوتووە، كەچی ئارەزووی كردەی سێكسی دەكات‌و ئامادەییە بۆ سێكسكردن لە دواوە، ئەو لە پەیوەندییەكی توند دایە لەگەڵ پاشماوەكانی جەستەی ‌و كردە سێكسییەكان. لەم بارەوە سەرنووسەری گۆڤاری (بریغیتە)، كە گۆڤارێكی ژنانەی ئەڵمانیە، دەنووسێت" لە كاتی خوێندنەوەی ئەو رۆمانە دووچاری رشانەوە‌و بارێكی دەروونی خراپ بوومەوە"، هەرچی رۆژنامەنووسی هۆڵەندی (جێرمان)ە، كە رۆمانەكەی بە زمانە بنەڕەتییەكەی خوێندۆتەوە، گوتی" ئەو رۆمانە پەردە لەسەر دیوی دواوەی جوانی ‌و نەرمونیانی ئافرتت هەڵدەداتەوە، ئەوە پیشان دەدات كاتێك ئافرەت دەبێتە سەرچاوەی شەهوەت‌و سێكسبازی قێزەوەنی ئەو، كە هیچ شتێكی تر لە بەرچاو ناگرێت، بێجگە لە تێركردنی برسیەتی سێكسی ‌و شەهوەتبازیەكانی خۆی". ئەو لە درێژەی قسەكانیدا سەرەڕای ئەوەی رۆمانی ناوبراو بە بوێر لە قەڵەم دەدا، بەڵام بە نموونەی رۆمانە بێڕەوشتەكانی دەبینی. شایانی باسە رۆمانی سێكسی لە رۆژئاوادا، گەشەیەكی بەرچاوی كردوە‌و رووبەڕێكی بەرفراوانی رۆمان ‌و چیڕۆكی گرتۆتەوە، بە پێچەوانەی رۆژهەڵات، كە رۆمانی سێكسی بەشێوەیەكی شەرمنانە دەنووسرێ‌ ‌و دەخوێنرێتەوە. بۆنموونە نووسەری نەمساوی (ئەلفرێد یەلینك) وەرگری خەڵاتی نۆبل، بە هۆی رۆمانەكانیەوە بە كەسێكی پۆرنۆگرافی ‌و بەرجەستەكەری پەیوەندییەكی وروژێنەری سێكسی رووت تاوانبار دەكرێت. رەخنەگرە ئەوڕوپییەكان، لە رەخنەكانیاندا بۆ رۆمانی سێكسی ئەوڕوپی، بۆ نموونە وەك رۆمانی (مەدام بۆفاری) ی گۆستاف فلۆبێر، جەخت لەسەر ئەوە دەكەن، كە ئەو رۆمانانە پڕوپاگەندەكردن ‌و رەواجدانە بە بەڕەڵایی، لەلایەن ئەو رۆمان نووسە بۆرجوازیانەی، كە بە بەرهەمی پێشكەوتنی سەرمایەداریان دەبینن لە ئەوڕوپا ‌و پێیان وایە لە سەر دەستی ئەوان رۆمانی رۆمانتیكی ‌و ئیرۆتیكی گوازیتەوە سەر رۆمانێك، كە تەنها گرنگی بە شەهوەت ‌و سێكسبازی ‌و پەیوەندی جەستەیی ‌و پۆرنۆگرافیا دەدات، كە لە پێشدا ئەدەبی ئەوڕوپی شتی وای بەخۆوە نەدیوە. هەندێ كەس پێیان وایە نووسەرانی عەرەب، كێبڕكێیانە لەسەر نووسینی رۆمانە سێكسییەكان، كەچی لە راستیدا ئەمە زیاتر لە سەرنووسەرانی رۆژئاوا جێبەجێدەبێت، بە بەراورد لەگەڵ نووسەرانی عەرەب، تا ئەو ئاستەی كە رۆژنامەی (داخ بلاد)ی هۆڵەندی، دەنووسێت" پەرتوكخانەكان بەرگەی ئەو ژمارە زۆرەی رۆمانە سێكسیەكان ناگرن، كە تەنها بە پاڵنەری قازانج دەنوسرێن ‌و هیچ ئامانجێكیان نیە، جگە لە قازانجی ماددی لە رێگای وروژاندن ‌و خۆشی بەخشینی سێكسی".  
ناشرینكردن لە ئەدەبی ئیرۆتیكیدا
ناشرینكردن لە نێو ئەدەبی ئیرۆتیكی گەیشتۆتە راددەیەك، كە رۆمان ببێتە ئامرازێك بۆ داواكاری ‌و بانگهێشتی سێكسی، كە تیایدا نووسەران بە ئاشكرا، بە ناسكی ‌و جوانی ‌و وروژانە سێكسییەكانی خۆیان هەڵدەدەن، بۆ نموونە رۆمان نووس (كارلاین) پێیوایە سێكس ئەزمونێكی دەردەست كراوە‌و پێویستە لە پەرتووكەكاندا بخرێتەڕوو. شایانی باسە، ئەم جۆرە نووسینە لە ئەدەبی ئیرۆتیكی گەیشتۆتە ئاستێك لە كاتی ئێستادا بەڕێژەیەكی زۆر دەخوێندرێتەوە‌و رەواجێكی زۆر گەورەی لە بازاڕی كتێبدا هەیە، كە هیچ  جۆرە كتیبَكی تر ناتوانێت بەربەرەكانێی بكات. یەكێك لە گرنگترین ئەو رۆمانانەی لەلایەن ئەوڕوپیەكان بەتایبەت هۆڵەندی ‌و بەلجیكیەكان دەخوێندرێنەوە، رۆمانەكانی (لیبولد دو ساشر)ە، كە تیایدا وەسفی كردە سێكسییەكان دەكات ‌و باس لە بەكارهێنانی ئازاری جەستەیی ‌و دەروونی ‌و سەركۆنەكردنی ئافرەت دەكات ‌و بەكاریان دەهێنێت بۆ وروژاندنی سێكسی، بەشێوەیەك ئەو دەڵێت" گرووپێك لە ئافرەتان هەن ئارەزووی كردەی سادی لە سێكسكردندا دەكەن، بۆیە منیش ناچارم ئارەزووەكانیان بەدیبهێنم". لە وڵاتە عەرەبییەكان نموونەی بەرچاو هەن لەسەر ئەو دوفاقیەی كولتوری عەرەبی پێی دەڕوانێتە بابەتی نووسینە سێكسییەكان لە ئەدەبدا، لەم بارەشەوە رۆماننوسی لوبنانی (عەلویە صەبح) خاوەنی رۆمانی (ناوی دڵداری) باسی ئەوە دەكات، چۆن رەخنە لە هەندێ‌ كاتدا دەبێتە بابەتێكی تەواو نێرانە، بەو مانایەی كە لە وڵاتە عەرەبیەكان رەخنەكردنی رۆمان‌و نووسینە سێكسییەكان لەپاڵ ئەو ئیزدواجیەتەی كولتوری عەرەبی بۆ سێكس هەیەتی، بەدەرە لە رەخنەی ئەدەبی زانستی ‌و دەچێتە بواری رەخنەیەكی نێرانەی رووتەوە. ئەو رۆماننووسە لە باسی خستنەڕووی لەش لە رۆمانەكانیدا، جەخت لەسەر ئەوە دەكات، باسكردن ‌و خستنەڕووی لەش ‌و پێكهاتە جەستەیەكان لە رۆمانەكانیدا، بریتیی نییە لە شەهوەتبازی، سێكسیش گوزارشتە لە جەستە بەدەر لەوەی بچێتە بواری مەسرەفگەرایی ‌و تەكنیكی سێكسی. لە درێژەی قسەكانیدا وا دەردەكەوێت، كە سێكس بەلای ئەوەوە كردەیەكی ژیانكردە، نە سێكس لە ژیان جیا دەبێتەوە‌و نە ژیانیش بێ‌ سێكس دەكارێت، جیابوونەوەشی كردەیەكی نامرۆییە. ئەو وا دەبینێت، لە رۆمانەكانی باس لە لەشی ئافرەتێك دەكات، كە لە ناوەڕاستی تەمەنیدایە ‌و جەخت لە سەر چۆنیەتی ژیاندنەوەی ئارەزووەكانی دەكاتەوە، ئەو لەسەر ژیاندنەوەی لەش ‌و زیندووكردنەوەی ئارەزوەكان كاردەكات، بەشێوەیەكی مرۆیی، نەوەك بە شێوەیەكی سێكسی رووت، بۆیە ئەو پێیوایە، نووسینەكانی دەچنە بواری ئیرۆسیەت ‌و زیندووكردنەوەی ژیان، نەوەك لەشفرۆشی. تێڕوانێنێكی تر پێیوایە، ئەدەبی سێكسی ژنانی عەرەب، دەچێتە بواری ئەدەبی تەرفیهی چەقبەستوو لە نێوان واقعیەت ‌و رۆمانسیەت، ئەمیش ئەدەبێكە، تاكو ئێستاش لە ژێر كۆتوبەندە كۆمەڵایەتی ‌و ئایینیەكان دەرنەچووە بە پێچەوانەی رۆژئاوا، كە دەمێكە توانیویەتی لەم پێوەرە كۆمەڵایەتی ‌و ئایینییانە خۆی قوتاربكات.
تێڕوانینی شەرمنانە بۆ رۆمانە سێكسییەكان
لە كۆمەڵگەی عەرەبیدا، بەشەرمەوە رۆمانە سێكسییەكان دەخوێندرێنەوە، رێسا ‌و تێڕوانینە ئاینیەكان تاكو ئێستاش لە بەرامبەر ئەم جۆرە نووسینانە دەوەستنەوە، بۆ نموونە لە میسر ساڵی 2003 لەگەڵ دەركەوتنی كتێبی (دە ئامۆژگاری بۆ عیشق لەگەڵ ژنان)، خەڵكانێك ناڕەزایی خۆیان پیشاندا لەبەرامبەر دەركەوتنی ئەم پەرتووكە‌و پێیان وابوو، كۆمەڵێك گوزارشتی سێكسی ئابڕوبەر لەخۆ دەگرێت ‌و فەرموودەكانی پێغەمبەری ئیسلام (د.خ)‌و ئایەتەكانی قورئان بۆ كۆمەڵە گوتەیەكی سێكسی ناشرین بەكاردێنێت. كەچی رۆمان نووس (لەیلە ئەتڕەش)، پێیوایە، كەموكوڕی ئەدەبی نییە ئەگەر نووسەر ئەو قەدەغەكراوانە فەرامۆش بكات، كە لە ژێر كاریگەری كۆتوبەندی كۆمەڵایەتی ‌و دەسەڵاتی باوكسالاری ‌و دەسەڵاتی سیاسی داپلۆسێنەر داڕێژراون. شایانی باسە زۆرێك لە رۆماننووسە عەرەبەكان هاوشێوەی (عالیە مەمدوح ‌و لەیلا عوسمان) لە رۆمانەكانیاندا بوێرانە لە بابەتەكانی سێكس نزیك بوونەتەوە، بەڵام بەرهەمەكانیان دوچاری رەخنە ‌و توانجێكی زۆر بۆتەوە، بەو پێییەی ناوەڕۆكی رۆمانەكانیان لەگەڵ دابونەریتی كۆمەڵگا‌و پارێزەرانی دەسەڵاتی نێرسالاری ناگونجێت.
- لە گۆڤاری (كۆوار) وەرگیراوە.