ئەمساڵ بڕی 589 ملیۆن دینار بۆ پڕۆژەكانی شارەوانی خەلیفان خەرجكراوە

ئەمساڵ بڕی 589 ملیۆن دینار بۆ پڕۆژەكانی شارەوانی خەلیفان خەرجكراوە


دیمانە/ سۆران سرێشمەیی

تاریق ئیبراهیم، سەرۆكی شارەوانی خەلیفان لە دیمانەیەكی تایبەتی زاری كرمانجیدا, وەڵامی چەند پرسیارێك دەداتەوەو تیشك دەخاتە سەر كۆمەڵێك پڕۆژەو كێماسی و پێویستییەكانی سنووری شارەوانی خەلیفان, . گووتی " لە رابردوو كۆمەڵێك پڕۆژەی گرینگ لە كۆنكرێت كردنی كۆڵانەكان و درووستكردنی جووت سایدی شارو رێگای كەمەربەند.. هتد، پێشكەش بە هاووڵاتییانی شارۆچكەی خەلیفان كراوە، سەرباری بوونی قەیرانی دارایی ئەمساڵیش بە بڕی ٥٧٩ ملیۆن دینار، هەردوو پڕۆژەی قیڕتاوكردنی رێگای پیشەسازی و كۆنكرێتكردنی رێگای كۆنی سرێشمە كە بە ناو گەڕەكی علیاوە تێدەپەرێت ئەنجامدراون". 
گەڕەكی بناری كۆڕەك كە سەرجەم كۆڵانەكانی تەنها تێكهەڵە رێژ كراون , دانیشتوانی گلەیی ئەوەیان هەیە تا ئێستا كۆڵانەكانییان كۆنكرێت نەكراون، تاریق ئیبراهیم گووتی " راستە و هاووڵاتییانی هەر گەڕەكێكی شارۆچكەی خەلیفان مافی خۆیانە گلەیی بكەن، ئێمە هەوڵی زیاتر لە توانای خۆمان دەدەین تا زۆرترین پڕۆژە بۆ خەڵك و شاری خۆمان ئەنجام بدەین، داواكاری پێشكەش بە وەزارەت بكەین، جگە لەمە بڕی میزانییەی ئێمە زۆر كەمەو بەشی چەند مەترێك كۆنكرێت ناكات، تا بتوانین لەسەر ئەركی شارەوانی پڕۆژە ی زیاتر  پێ جێبەجێ بكەین، بۆیە پێویستە هاووڵاتییان بەگشتی لەبارەی ئەو ڕاستیانە ئاگاییان هەبێت". 
لە بارەی دابینكردنی زەوی پێویست بۆ پڕۆژەكان، سەرۆكی شارەوانی روونیكردەوە" لە ئەگەری دەرچوون و جێبەجێكردنی هەر پڕۆژەیەك، جا دروستكردنی قوتابخانە یا باڵەخانەیەكی حكوومی و هتد..، لە سنووری شارەوانی خەلیفان، كێشەی دابینكردنی زەویمان نییە". 
داواكاری سەرەكی گەنجان و هاووڵاتییانی خەلیفان درووستكردنی پاركێكە بۆ حەسانەوەو بەسەر بردنی كاتێكی خۆش سوودی لێوە ببینن، سەرۆكی شارەوانی دەڵێت" لەسەر ئێمە پێویستە زەوی بۆ هەر پڕۆژەیەك دابین بكەین، بۆ ئەم مەبەستەش بە هاوكاری لەگەل بەڕێوەبەری ناحییە، هەوڵی خۆمان داوە كە پاركێك بۆ هاووڵاتییانی خەلیفان درووست بكرێت، لە هەوڵەكەش بەردەوام دەبین".
لە بارەی كێشەی زێدەڕۆیی كردنە سەر زەوی حكوومەت و نەبوونی تاپۆ لە سنووری شارەوانی خەلیفان، ناوبراو ئاماژەی بەوەدا " هیچ شوێنێك و شارەوانییەك نییە كێشەی زێدەڕۆی نەبێت، لەمبارەیەوە كەمترین كێشەمان هەیە، بەڵام كێشەی تاپۆمان هەیە، بە مەبەستی چارەسەری پێویست بۆ ئاریشەی تاپۆ، بیرمان لە دووبارە داڕشتنی ماستەر پلانێك كردۆتەوەو هەوڵیشمان بۆی داوە". 
دەربارەی كێشەی گیرانی ئاوەڕۆ و مەزراكان لە سەنتەری شار بەگشتی و كۆتایی جووت سایدی خەلیفان و پردی زارگەلی بەتایبەت كە لە هەندێك ساڵ داو  لە وەزری زستان، دەبێتە هۆی گڵدانەوەی ئاو و دروستبوونی لافاو، بەم هۆیەشەوە كێشەی هاتووچۆ چێدەبێت، سەرۆكی شارەوانی خەلیفان گووتی " سرووشتی هەڵكەوتەی جوگرافی خەلیفان جۆرێكە لە شێوەی دۆڵ یا شیو دەچێت، بەم شێوەیەش بڕێكی زۆر لە ئاوی بەفرو باران و تەنانەت قوڕو لیتەو بەرد، بەتایبەتیش ئەگەر ڕێژەی باران بارین زۆر بێت، بۆ ناو شارۆچكەكە شۆڕدەبێتەوە، ئەمەش وادەكات ئاستی ئاو لەو شوێنانە بەرز ببێتەوە، بۆ ئەم مەبەستەش هەوڵی زۆرمانداوەو چارەسەری كاتیمان بۆ ئەم كێشەیە كردووە، بەڵام چارەسەرەكە كۆتایی نەبووە، بێگومان هەوڵی چارەسەری بنەڕەتی بۆ ئەم ئاریشەیە دەدەین".
تاریق  ئیبراهیم، لەبارەی پرسیاری ئەوەی كە كێشەی ڕێگای خەلیفان ــ سرێشمە، كە بریتییە لە پێچێكی تەسكی نێوان گۆڕستانی زارگەڵی و خانووی هاووڵاتییەك لەسەر لایەكی رێگاكە و چەندین رووداوی هاتووچۆ لەم پێچە ناڕێكە ڕوویداوە، ئاماژەی بەوە كرد " بەڵێ ئەو شوێنەی ئێوە باسی دەكەن لە سنووری شارەوانی ئێمە دایەو هەوڵی زۆرمانداوە بۆ چارەسەركردنی و فرەوانكردنی شوێنەكە، تەنانەت خودی سەرپەرشتیاری ئیدارەی سەربەخۆی سۆران سەردانی شوێنەكەی كردووە، ئەگەرچی بە هەماهەنگی لەگەڵ شارەوانی سرێشمەو كەسانی تر، هەوڵی زۆریشمانداوە چارەسەری ئەم گرفتە بكرێ، بەڵام بەداخەوە كێشەكە زۆر لەوە گەورەترە كە خەڵكی تر باسی لێوە دەكات، چونكە لەلایەك خاوەنی خانوو، ئامادە نییە بەبێ قەرەبووكردنەوە خانووی خۆی چۆڵ بكات و لە لایەكی تریشی گۆرستانە و كەس و كاری مردووەكان كە لە گۆڕستانەكەدا نێژراون ئامادە نین گۆڕی مردووەكەیان بۆ شوێنێكی تر بگوازنەوە، تا چارەسەری بنەڕەتی ئەم رێگا مەترسیدارە بكرێ و لە رووداوی تری هاتووچۆ لەم پێچەدا كەس نەبێتە قوربانی، جگە لەم هەوڵانە پێویستە مامۆستایانی ئاینی و كەسایەتی كۆمەڵایەتی و بەرپرسانی حزبی حكوومی بێنە سەرخەت بۆ چارەسەر كردنی ئەم كێشەیە".
لەكۆتای قسەكانیدا, سەرۆكی شارەوانیدا، دەربارەی بە قەزاكردنی ناحیەی خەلیفان گووتی"  بۆ ئەم مەبەستە، چوار ساڵ پێش ئێستا و بەهەماهەنگی لەگەل سەرجەم بەڕێوەبەرەكانی شارۆچكەكەو بەرپرسانی تری حزبی سەردانی كۆمەڵێك شوێنمان كرد، بەتایبەتیش ئەنجوومەنی پارێزگای هەولێر كە لە ڕووی كارگێڕییەوە ناحییەی خەلیفان سەر بە پارێزگای ناوهێنراوە، لە ئێستا كە سۆران بۆتە ئیدارەی سەربەخۆ ئەگەرێكی زۆر نزیكە خەلیفان ببێتە قەزا، هیوادارین هەنگاوەكان لەمەڕ ئەم پرسە خێراتر بكرێن و مژدەی بە قەزاكردنی خەلیفان بگات بە گوێی هاووڵاتییانی ئەم شارۆچكەیە. 

زۆرترین بینراو