تەواوی گەڕەك و كۆڵانەكانی سیدەكان گرفتی خزمەتگوزاریان هەیە

تەواوی گەڕەك و كۆڵانەكانی سیدەكان گرفتی خزمەتگوزاریان هەیە

موڕشید برادۆستی – سیدەكان: 
ماوەی چەندین ساڵە گەڕەك و كۆڵانەكانی ناحیەی سیدەكانی سەر بە ئیدارەی سۆران كاری نۆژەن كردنەوە و قیڕتاوكردنییان بۆ نەكراوە و دانیشتووانی ئەو گەڕەكانە لە هەر دوو وەرزی هاوین و زستان بەهۆی خراپی كۆڵانەكانیان گرفتی زۆریان بۆ دروست دەبێت، سەرۆكی شارەوانی سیدەكان دەڵێت" پڕۆژەی رێگەی سەرەكی گەڕەكی گوڵان لە قۆناغی كۆتایدایە و رەزامەندی دارایی قیڕتاوكردنی شەقامی فەرمانبەرانیشمان وەرگرتووە.
دانیشتووانانی سەنتەری سیدەكان ئاماژە بۆ ئەوەدەكەن، لە زۆربەی خزمەتگوزارییە سەرەتاییەكان بێبەشن، بە قسەی خۆیان، داواكاری زۆریان پێشكەش بە شارەوانی و لایەنە پەیوەندیدارەكان كردووە بۆ چاككردنی گەڕەك و كۆڵانەكانییان. 
یونس محەمەدئەمین، موختاری گەڕەكی برادۆست بە زاری كرمانجی گووت" گەڕەكەكەمان لە تەواوی خزمەتگوزاری سەرەتایی وەك قیڕتاوكردنی شەقام و كۆڵانەكان، قوتابخانە، ئاو و ئاوەڕۆ و مزگەوت و خزمەتگوزاریەكانی دیكە بێ بەشە و تا ئێستا نەتوانراوە ئەو خزمەتگوزارییانە لە گەڕەكەمان جێبەجێ بكرێت، لە وەرزی زستانیش نزیك دەبینەوە، قوڕ و چڵپاو گرفتی سەرەكییە بۆ دانیشتووانانی گەڕەكەكەمان بە تایبەت هاتووچۆی قوتابیان، چەندین جار داوامان لە حكوومەت كردووە، تا ئێستا خزمەتگوزاری لە  گەڕەكەكەمان نەكراوە، پێویستە چارەیەكەمان لێ بكرێت.
جیا لە گەڕەكی برادۆست، گەڕەك و كۆڵانەكانی ئازادی، فەرمانبەران، راپەڕین، سیدەكانی كۆن و گەڕەكەكانی تریش گرفتی زۆری خزمەتگوزاریان هەیە و لە رێگەی زاری كرمانجی داوا لە حكوومەت دەكەن چارەسەرێك بۆ بدۆزنەوە.
لای خۆیەوە، عەبدولقادر ئەكرەم، سەرۆكی شارەوانی سیدەكان، بە زاری كرمانجی راگەیاند" لە رۆژانی رابردوو، دەست بە چاككردن و نۆژەن كردنەوەی پڕۆژەی گەڕەكی گوڵان لە سیدەكان كراوە و پڕۆژەكە زۆربەی كارەكانی تەواو كراوە و لە قۆناغی كۆتایدایە و لە چەند رۆژی داهاتوودا قیڕتاو دەكرێت .
سەرۆكی شارەوانی سیدەكان دەڵێت" دوای هەوڵێكی زۆر خۆشبەختانە رەزامەندی دارایی بۆ قیڕتاوكردنی گەڕەكی فەرمانبەرانیشمان وەرگرتووە، لەسەر بودجەی داهاتی گشتی شارەوانییەكان و بودجەی پەرەپێدانی پارێزگای هەولێر  بە گوژمەی  263  ملیۆن دینار لە ماوەی هەفتەیەك بۆ دوو هەفتە كۆتای پێدێت و هەوڵ ئەدەین هەردوو گەڕەك بەیەكەوە قیڕتاو بكرێن .
دووپاتی كردەوە" بەشێوەیەكی گشتی سەرجەم گەڕەك و كۆڵانەكانی سیدەكان پێویستییان بە قیڕتاو كردن و نۆژەن كردنەوە هەیە، لە قۆناغی یەكەمدا، هەردوو گەڕەكی فەرمانبەران و گوڵان، كە هاتووچۆی زۆریان لەسەرە و ماوەی چەندین ساڵە كاری چاككردنەوە و نۆژەن كردنەوەیان بۆ نەكراوە و گرفتی زۆر لە رێگا و شەقامەكەدا هەیە بە قیڕتاوكردن ئاسانكاری باش بۆ شوفێران و هاتووچۆی هاووڵاتییان دروست دەبێت".
بە گووتەی سەرۆكی شارەوانی سیدەكان، دەرخستەی چەند گەڕەك و كۆڵانێكی سنوورەكەییان كردووە و ئەو شوێنانەی كە زۆر پێویست بن هەوڵ ئەدەن خزمەتگوزارییان پێشكەش بكەن بە تایبەت گەڕەكی برادۆست لە دەروازەی ناحیە .
جێگەی ئاماژە پێكردنە، كابینەی نۆیەمی حكوومەتی هەرێم، لە شار و شارۆچكەكانی كوردستان گرنگی زۆری بە قیڕتاوكردن و نۆژەن كردنەوە و بە دووساید كردنی رێگا سەرەكی و لاوەكییەكان داوە و ئاستەنگەكانی هاتووچۆ بەشێوەیەكی باش چارەسەر كراون و ئاسانكاری زۆر بۆ هاووڵاتییان و شۆفێران بە تایبەتی لە نێوەندی شارەكان دروست بووە. 
سیدەكان یەكێكە لە ناحیەكانی سەر بە ئیدارەی سەربەخۆی سۆران، ساڵی 1932 بووەتە ناحیە، خاوەنی زیاتر لە 250 گوندە و رێژەی دانیشتووانی 20 هەزار كەسە، لە رووی رووبەری جوگرافیاوە گەورەترین ناحیە لەسەر ئاستی عێراق و كوردستان، لەلایەن خەڵكی ناوچەكە و بەرپرسانی دەڤەرەكە هەوڵێكی رژد هەیە بۆ بە قەزا بوونی ناحیەكە".

زۆرترین بینراو