دەركەوتن و درەوشانەوەی ئەستێرەیەك 

دەركەوتن و درەوشانەوەی ئەستێرەیەك 

سەمەد سازیار : هەوڵمداوە بە زانیاری و فێربوونی زیاتر، بە مانا و كردار هونەرمەند بم


مەهدی محەممەد – زاری كرمانجی : كەمن ئەو كەسانەی كە لە تەمەنێكی بچووكدا، بە گەورەیی دەردەكەون و بە توانا و لێهاتوویی خۆیان دەوروبەر سەرسام دەكەن، 
سەمەد ی تەمەن 18 ساڵ بە دەنگە ئەفسوناوییەكەی و سازە هاوڕێیەكەی دەستی، جیهانێكی هونەریی تەژی لە ئیحساس و چێژبەخشین و جوانیی ئەفراندووەو، وایكردووە رۆژ بە رۆژ دەنگ و رەنگی، سنووری شارەكان ببڕێ و تۆڕە كۆمەڵایتییەكان پڕ لەچالاكی خۆی بكات.
سەمەد ئەیوب كە بە (سەمەد سازیار) ناسراوە، لە دایكبووی ساڵی 2003 ی شارە جوانەكەی كەركووكە و، ماوەی 11 ساڵ دەبێ لەگەڵ خانەوادەكەی لەشاری سلێمانی ژیان دەكەن، ئەو خوێندكاری قۆناخی سێیەمی پەیمانگەی هونەرە جوانەكانی سلێمانییە.
سەمەد هەر وەكو خۆی بۆ زاری كرمانجی باسی دەكات، لە تەمەنی منداڵیەوە خولیایی موزیك و گۆرانی بووەو 8 ساڵ بەر لە ئێستا بە كردار خۆی لەنێو ئەو دونیایەدا دۆزیەوەتەوەو دەنگ و توانا و لێهاتوویی خۆی خستۆتە خزمەت هونەری كوردی،    
سەمەد دەنگێكی خۆشی هەیەو بەهەردوو زاراوی سۆرانی و بادینی گۆرانی دەڵێ و شارازاییەكی زۆر باشیشی لەگەڵ ئامێرە ژێدارە ریشەییەكان هەیە و دەڵێ‌"زیاتر كار لەسەر ساز دەكەم و 11 ساڵە هاورێی یەكترین"، هەر ئەوەش وای لە سەمەد كردووە بەردەوام لەگەڵ سازەكەی دەربكەوێت.
پەیمانگەو تۆڕە كۆمەڵایەتیەكان دوو مینبەری كار و چالاكییە هونەرییەكانی سەمەد ن، لەو دوو رێگەیەوە كاری هونەری خۆی پێشخستووەو گوێگر و هەواداری بۆ خۆی پەیداكردووە.
سەمەد خاوەنی بەرهەمێكی تایبەتی خۆیەتی كە پێشكەشی پێشمەرگەی كردووە لەجەنگی دژ بە داعش و دەڵێ‌"یەكەم بەرهەمی هونەریم ڤیدیۆ كلیپێك بوو بە ناوی (سڵاو لە پێشمەرگە) كە لەبەرەكانی جەنگ تۆماركراوەو وەك وەفایەك بۆ بەرگری و خۆڕاگری پێشمەرگە لە جەنگی دژ بە داعش و پارێزگاریكردنی لە خاكی پیرۆزی كوردستان".
سەمەد باس لەوەش دەكات كە لە ئایندەیەكی نزیكدا بەرهەمی نوێی دەبێ و دەڵێ:"هەمیشە هەوڵمداوە بە زانیاری نوێی و فێربوونی زیاتر خۆم پڕ چەك بكەم و بە مانا و كردار هونەرمەند بم، هەر لەبەر ئەوەش پەلە ناكەم لەبڵاوكردنەوەی بەرهەمەكانم، چونكە ناخوازم بەرهەمەكان بە پەككەوتوویی بهێنەبوون"،  
سەمەد سازیار لە دوا وتەكانی خۆی بۆ زاری كرمانجی وتی"لە ئێستاوە كار بۆ ئەوە دەكەم ببم بە ئەستێرەیەكی گەشاوە لە ئاسمانی هونەری كوردی، ئەوە ئاوات و هیوای منە و هەنگاوەكانیش ئەوەم پێ دەڵێن كە هیچ شتێك مەحاڵ نییە".

 

زۆرترین بینراو