رواندزیش دەنگ دەدات 

رواندزیش دەنگ دەدات 

زاری كرمانجی – رواندز : 

 قەزای رواندزیش وەك تەواوی شارەكانی تری هەرێمی كوردستان، ئەمڕۆ كاتژمێر 7 ی بەیانی هێزە ئەمنییەكان لە هەردوو وێستگەی بنكەی دەنگدانی قوتابخانەی پاشای گەورە لەپێناو هەڵبژاردنی كاندیدەكانیان بۆ پەرلەمانی عێراق دەنگیاندا.
وەلید محەممەد بەرپرسی بنكەی كۆمسیۆنی رواندز لەبارەی بەڕێوەچوونی هەڵبژاردنەكەوە بە زاری كرمانجی راگەیاند : "رواندز تەنها یەك بنكەی دەنگدانی هەیە كە پێكهاتووە لە دوو وێستگە و ٨٠٢ كەس مافی دەنگدانی هەیە، لە كاتژمێر 7 بەیانی پرۆسەكە بە شێوەیەكی زۆر ئارام و دیموكراسیانە و دوور لە هەر كێشەیەك  بەڕێوەدەچێت" .
ئامێرەكانی دەنگدان تاكو ئێستا هیچ كێشەیەكی بۆ دروست نەبووە، تەنها ئامێرەی پەنجە مۆر نەبێ كە زۆر بە خاوی كار دەكات، وەلید هۆكاری خاوی ئامێرەكەی بۆ تەمەنی دەنگدەر و نەمانی ئاسەواری پەنجەمۆرییان دەگەڕێنێتەوە.
كێشەی نەگەڕانەوەی ناوی هەندێ لە دەنگدەران هەبوو، بەڵام بەرپرسی بنكەی كۆمسیۆنی رواندز دەڵێ رێژەكە ئەوەندە نییە جێگەی باسكردن بێ.
دەنگدەر لەكاتی دەنگدان، كارتی بایۆمەتری لێ وەردەگێڕێتەوە بۆ ئەوەی لە هەڵبژاردنی گشتی جارێكی تر دەنگ نەداتەوە، لەبەرامبەردا وەسڵێكی  پێ دەدرێ.

 

 

 

 

 

زۆرترین بینراو