رێبەر حوسنی پەیوەندی بە هەڵبژاردەی عێراق دەكات

رێبەر حوسنی پەیوەندی بە هەڵبژاردەی عێراق دەكات

زاری كرمانجی- ئاژانسییە هەواڵییە وەرزشییەكان: رێبەر حوسنی بابیر، یاریزانی كوردی ئێزیدی یانەی بۆرووسیا دۆرتموندی ئەڵمانی پەیوەندی بە مەشقەكانی هەڵبژاردەی لاوانی عێراقەوە كرد.
رێبەر حوسنی بابیر، دوێنێ یەكشەممە گەیشتە بەغدا بۆ ئەوەی بچێتە نێو مەشق و راهێنانەكای تیپی هەڵبژاردەی لاوانی عێراق، دوای ئەوەی بەشێوەیەكی فەرمی لە لایەن راهێنەری تیپەكەوە بانگهێشتكرا.
رێبەر كوردێكی ئێزیدییە، لە 2ی 8ی 2005 لە قەزای شەنگالی باشووری كوردستان لەدایكبووەو ساڵی 2011 لەگەڵ خانەوادەكەی چوونەتە ئەڵمانیاو لە شاری بیلێفێڵد نیشتەجێ بوونە.
عیماد محەممەد، راهێنەری هەڵبژاردەی لاوانی عێراق، لەبارەی رێبەرەوە گووتی" رێبەر حوسنی دوای گەیشتنی بۆ بەغدا دەچێتە نێو كەمپە داخراوەكەی تیپەكەمان لە بەغدا و بەشداری لە مەشق و یارییە دۆستانەكانماندا دەكات بۆ ئەوەی هەلی ئەوەی هەبێت لەگەڵ یاریزانە هاوڕێكانیدا بگونجێت، پێش ئەوەی بەشداری لە پاڵەوانێتی عەرەبیدا بكەین".
ئەو راهێنەرە زیاتر گووتی" یاریزانە پیشەگەرەكانی دیكەشمان دواتر دەگەنە بەغدا بۆ بەشداریكردن لە كەمپی هەڵبژاردەی لاوان، كە لە 11ی ئەم مانگە دەستپێدەكات، بۆ ئەوەی لە نزیكەوە ئاستی تەكنیكییان ببینین و هەڵسەنگاندنیان بۆ بكەین وەك هەموو یاریزانانی تیپەكە، بۆ ئەوەی دەرفەتیان بۆ بڕەخسێنین" .
رێبەر حوسنی، دڵخۆشی خۆی نیشاندا بۆ نوێنەرایەتیكردنی عێراق و گووتی" هەموو شتێك دەكەم بۆ ئەوەی ستافی راهێنەرایەتی هەڵبژاردەی لاوانی عێراق لە تواناكانم رازی بكەم، دمەوێ خزمەتی شێرەكانی رافیدەین بكەم لە پاڵەوانێتی عەرەبی لە میسر". 
هەڵبژاردەی لاوانی عێراق بەشداری لە پاڵەوانێتی لاوانی عەرەب بۆ تەمەن خوار 20 ساڵان دەكات، كە رۆژی 20ی ئەم مانگە لە میسر دەستپێدەكات و لە 6ی 7ی 2021 كۆتایی دێت، هەڵبژاردەی عێراق كەوتۆتە كۆمەڵی سێیەمەوە.
رێبەری تەمەن 16 ساڵ، پێشتر بۆ تیپی تازەپێگەیشتووانی یانەی ئەرمینیا بیلێفێڵدی ئەڵمانی یاری دەكردو دواتر چووە ریزەكانی بۆرووسیا دۆرتموند، كە ئێستا بۆ تیپی لاوانی ئەو یانەیە یاری دەكات، ئەو كە لە هێڵی هێرشبردن یاری دەكات و كاپتنی تیپەكەیەتی، بە چوار زمان دەتوانێت قسەبكات، كوردی، عەرەبی، ئەڵمانی و ئینگلیزی.
رێبەر پێشتر لە لێدوانێكی رۆژنامەوانیدا، ئاشكرایكردووە یانەی بایرن میونخی ئەڵمانی بۆندێكی باشی پێشكەش كردووەو بەڵێنی پێداوە ئەركی نێشتەجێكردن و خوێندنیشی لەئەستۆ بگرێت، بەڵام ئەو بۆرووسیا دۆرتموندی هەڵبژاردووە بەهۆی نزیكی ئەو شارە لە شاری بیلێفێڵد.

زۆرترین بینراو