رەوشا كوردستانێ رێكەفتنەكا ستراتیژی دخازیت

 غیاس خالد زێباری 

رەوشا سیاسی و ئابووری و جڤاكی یا كوردستانێ پشتی گەماروویێن سیاسی و ئابووری یێن حكومەتا ئیراقێ دژوار بوویە بتایبەت پشتی روودانا خیانەتكاریا 16 ێ ئۆكتۆبەرا سالا 2017 و هەتا نهۆ پەیوەندیێن پارتی دیموكراتی كوردستان سرۆشتی نەبووینەڤە، دڤێرەدا دیار دبیت كۆ رەوشا كوردستانێ یا ب پەیوەندیێن ڤان هەردوو پارتیا ڤە یا گرێدایی یە چونكی دەمێ سیهــ سالایە دەستهەڵاتا كوردستانێ یا ددەستێ ڤان هەردوو پارتیا ، هێزێن پێشمەرگەی و ئەولەكاریێ ژی دیسان  یێن دبن كاریگەریا ڤان هەردوو پارتیا دا ، هەر وەسا پڕانیا هێزا ئابووری و دارایی . 
ژبەركۆ گڤاشێن سیاسی و ئابووری یێن ئیراقێ لسەر هەرێما كوردستانێ درێژ بوون بتایبەت یێن ئابووری، رەوشا خەلكێ كوردستانێ رۆژ بۆ رۆژێ دژوارتر دبیت نەخاسمە پشتی ئەڤ ساڵە بهایێ كەل و پەلی بتایبەت یێن خارنێ و سۆتەمەنی زۆر گران بووی و د سەرڤەی  شیانێن خەلكی نە . ئەڤ چەندە ئەگەرەكە ل ئەگەرێن هزركرنا خەلكێ كوردستانێ بۆ دەرڤەی وەڵاتی. 
ئەڤ رەوشا كوردستانێ پێتڤی ب پێداچوونەڤەیەكا جدی یا دەستهەلاتا كوردستانێ، هەر گاڤەكا بۆ چارەسەریا ڤێ پرسا خەلكێ كوردستانێ بهێـە هاڤێتن ئەگەر ئاشتەوایا پارتی و ئێكەتی دگەل نەبیت سەرگرتنا وێ یا بزەحمەتە، سەربۆرێن بەرێ دیار دكەن كۆ ب رێكەفتن و ئاشتەوایا پارتی و ئێكەتیێ رەوشا سیاسی و ئابووری یا كوردستانێ سەقامگیر دبیت ، هەر وەكی رەوشا كوردستانێ پستی رێكەفتنا ستراتیژی یا دناڤبەرا پارتی و ئێكەتی دا ل  27/7/2007  ب واژوویێن سەرۆك مەسعوود بارزانی و رەحمەتی مام جەلال تالەبانی . 
رێكەفتنەكا راست و دروست و ب بیر و باروەر بیت كۆ ستراتیژیەتەكا نەتەوەیی و نشتیمانییا كوردستانی بهێـە دارشتن بۆ ڤێ قۆناغێ و قۆناغێن داهاتی ، چ لسەر ئاستێ هەرێما كوردستانێ بیت یان لسەر ئاستێ ئیراقێ و هەرێمایەتی و نیڤ دەولەتی، رێكەفتنەك بیت رەوشا سیاسی و كارگێری و ئابووری یا كورد و كوردستانیا لسەر ڤەی هەمی بەرژەوەندا بیت، لسەر بنەمایێن وێ ستراتیژیەتێ سەرەدەریێ لگەل ئیراقێ و دەرڤە بكەن  بۆ دابینكرن و پاراستنا ماف و ئارمانجێن خەلكێ كوردستانێ، دەرگەهی ل دووبارەنەبوونەڤا خیانەتەكا مینا یا 16 ێ ئكتۆبەرا سالا 2017 بگریت ئەوا باندەكێ دەستهەلاتدار دناڤ ئێكەتیێ دا مەزنترین زیانێن سیاسی و ئابووری و جڤاكی و ئێمناهی گەهاندی كوردستانێ  وان برینا سارێژ بكەت . 
رێكەفتنەك بیت ژبلی مادیێن سیاسی و ئێمناهی، گرێبەستەكا شەرەفێ بیت بۆ دارشتنا بەرنامێ پاراستنا سیستەمێ دیموكراسی ل كوردستانێ و سازیكرنا هەمی سازیێن دەستهەلاتێ و ئەنجامدانا چاكسازیێن بنەڕەتی و سەروەریكرنا یاسایێ و خرڤەكرنا هەمی داهات و سەروەت و سامانێ وەڵاتی د خەزینا حكومەتێ دا  و نشتیمانیكرنا كەرتێن لەشكری ( پێشمەرگە ) ، ئێمناهیێ و هەواڵَگیریێ، داكۆ جهێ هەمی وەڵاتیێن كوردستانێ ب جوداهیێن سیاسی تێدا هەبن . 
ئەز باوەرم دەلیڤا رێكەفتنەكا بڤی رەنگی دناڤبەرا پارتی دیموكراتی كوردستان و ئێكەتیا نشتیمانی كوردستان پشتی روودان و گۆڕانكاریێن ڤێ دووماهیێ دناڤ ئێكەتیێ دا بساناهیتر كریە و دێ شێن بەرپەرەكێ نوو ڤەكەن و بۆ سەردەمێ پەیوەندیێن زێڕین ڤەگەرێن و هێزا كوردستانێ دێ گەهیتە وی ئاستی خۆ لبەر هەر گۆڕانكاریەكا نەچاڤەرێكری ل ئیراقێ و رەڤەرێ بگریت و رەوشا ژین و ژیارا خەلكێ كوردستانێ دێ باشتر بیت ، ئەڤ رەوشا نەچاڤەرێكریا بوویە ئەگەرێ بێ ئۆمێدیا خەلكی و بەرێ وان دایە پەنابەریا بەرەڤ ئەوڕۆپا . حكومەتا هەرێما كوردستانێ ژی دێ بیتە حكومەتەكا نشتیمانیا بهێز و كارنامە و پلانێن خۆ ب درۆستی بجهـئینیت و خەلكێ كوردستانێ ژی دێ خۆ پشكەك ل حكومەت و دەستهەڵاتێ زانیت .

بابەتى پەیوەندیدار بیروڕا

زۆرترین بینراو