سەرۆكی شارەوانی سمیلان: هیچ ئامێرێكمان نییە لەكاتی لافاو و رووداوە سروشتییەكان بەكاری بێنین

سەرۆكی شارەوانی سمیلان: هیچ ئامێرێكمان نییە لەكاتی لافاو و رووداوە سروشتییەكان بەكاری بێنین


كەریم سمكۆ- زاری كرمانجی:

سادق وەسمان، سەرۆكی شارەوانی سمیلان، لە دیدارێكی زاری كرمانجی رایدەگەیەنێت:   ئەمساڵ كۆمەڵێك پڕۆژەی خزمەتگوزاری گرنگ لە سنووری شارەوانیمان جێبەجێ دەكرێن و ئێستا بەشی زۆری تەواو كراون، كە كاریگەری باشیان هەیە لەسەر ئاوەدانی ناوچەكەمان و باشتركردنی ژیانی خەڵك و جێبەجێكردنی داواكاری هاووڵاتییانی سنوورمان، ئەوانیش پێكهاتوون لە  پڕۆژەی قیڕتاوكردنی شەقامی سەرەكی سەنتەری ناحیە، كە بریتییە لە 12 هەزار و 500 مەتر چوارگۆشە،  جگە لە قیڕتاوكردن دانانی كربستۆن و دیواری پاڵپشتیش لەخۆ دەگرێت،  ئەمیش بە گوژمەی 274ملیۆن دینار لەگەڵ كۆنكرێتكردنی كۆڵانەكانی گەڕەكی ماوان كە ئەویش خۆی دەبینێتەوە لە 6 هەزار و 300 مەتر چوارگۆشە بەگوژمەی 139ملیۆن دینار كە هەردوو پڕۆژەكە لەسەر بوودجەی پارێزگای هەولێر جێبەجێ‌ دەكرێت.
سەرۆكی شارەوانی سمیلان ئەوەش دەخاتەڕوو: بێگومان جێبەجێكردنی ئەم پڕۆژانە خواستی هەموو لایەك بوو، بەتایبەت دانیشتوانی سەنتەری ناحیە، چونكە جگە لەوەی پێشتر ناوچەكە سیمایەكی ناشیرینی دەبەخشی، گرفتێكی گەورەی بۆ بواری هاتووچۆ دروستكردبوو، هەروەها رێگاكە كارئاسانی تەواو دەكات بۆ هاتووچۆی دانیشتووانی  زیاتر لە 30 گوندی ناوچەكەمان بە سەنتەری ناحیەشەوە.
سەبارەت بە كاریگەری رووداوە سروشتییەكان و بەتایبەتی لافاو بەسەر ناوچەكەدا، سەرۆكی شارەوانی سمیلان دەڵێت: ڕووداوی سروشتی و لافاو كاریگەری زۆری لەسەر سنووری شارەوانیمان و ناوچەكە بەگشتی ماوە، چونكە لەڕووی دەروونییەوە خەڵكی تووشی دڵەڕاوكێ‌ كردووە هەر كاتێك بارانی بەلێزمە ببارێت خەڵكی تووشی ترس دەبێت و بە ئاماژەی كارەسات بیری لێدەكەنەوە، هەروەها بەهۆی ڕاماڵینی درەختی قەراغ  ڕووبار سیما و سروشتی جوانی ناوچەكەی شێواندووە، وە ڕەنگە تا ساڵانێكی زۆر سروشتەكە وەك جارانی لێ نێتەوە، ئەمە كاریگەری خراپی كردۆتە سەر رووبەری سەوزایی لە سنوورەكەمان و زۆربەی پڕۆژەكانیش بەهۆی كاریگەری ئەم لافاوەی چەند ساڵی رابردوو ئێستاش بە تەواوی چاك نەكراونەتەوە.
سەبارەت بە كۆكردنەوەی زبڵ و خاشاكی ناوچەكەش، دەڵێت:  رۆژانە لەلایەن كرێكارانی ژینگەپارێز زبڵ و خاشاكی ناوچەكەمان كۆدەكرێتەوە و  لە شوێنێكی تایبەت كە بە تەل پەرژین كراوە كۆ دەكرێـتەوە و دواتر بە ئامێری شۆفەڵ  ژێرخاك دەكرێت و بەشێوەیەكی تەندروست بۆ ئەوەی كاریگەری نەبێت لەسەر تەندروستی هاووڵاتییان و زیانی نەبێت بۆ ژینگەی ناوچەكەمان. جگە لە سەنتەری ناحیەش 20 گوند لە پڕۆسەی پاككردنەوە دایە و رۆژانە تیمەكانمان سەردانیان دەكەن و زبڵ و خاشاكەكەی كۆدەكرێتەوە بەشێوەیەكی رێكخراو.
سادق وەسمان، سەبارەت بە گرفتەكانیان ئەوە دەخاتەڕوو: بێگومان كێشە زۆرن لەكاتی رووداوی سروشتی، چونكە مەترسی گەورە لەسەر گیانی هاوڵاتیان دروست دەكات و زیانی ماددی دەبێت بۆ زۆربەی هاووڵاتییان و بەتایبەتیش بۆ پڕۆژە خزمەتگوزارییەكان، چونكە زۆربەی گوندەكان لە قەراغی ڕووبارەكاندا نزیكن، زۆر جار دەبێتەهۆی ڕِووخانی خانووی هاوڵاتییان و تێكدانی سروشتی ناوچەكە، سەرەڕای ئەوەش ئێمە وەك شارەوانی هیچ ئامێرێكمان نییە لەكاتی رووداوە نەخوازراوەكاندا بەهانای خەڵك بچین و لەكاتی پێویست سوودی لێوەربگرین.
گووتیشی: لە رێگای هەفتەنامەی زاری كرمانجییەوە داوا لە سەرووی خۆمان دەكەین زیاتر دەستی خزمەتگوزاری بۆ سنورەكەمان درێژ بكەن، بەتایبەت لە بواری گەیاندنی پڕۆژە خزمەتگوزارییەكان، چونكە ساڵ بە ساڵ رووبەری سەنتەری ناحیە بەرفراوانتر دەبێت و داواكاری هاووڵاتییانیش بەردەوامە بۆ گەیاندنی پڕۆژە خزمەتگوزارییەكان. بۆ ئەوەی وەكو ساڵانی پێشووتر تووشی زیانی رووداوە سروشتییەكان نەبینەوە و پڕۆژە خزمەتگوزارییەكانمان بە هەدەر نەڕوات، پێویستە لایەنی پەیوەندیدار بیر لە دروستكردنی بەنداوی بچووك لە ناوچەكەماندا بكاتەوە، چونكە دروستكردنی بەنداوی بچوك لە ناوچە شاخاوییەكان بۆ  گلدانەوەی ئاو و ڕێگریكردن لە زیانی رووداوە سروشتییەكان سوودێكی زۆر باشی هەیە و لە ناوچەكەی ئێمەش كە شاخاوییە بەنداو رێگری باش دەكات لە رووداوی سروشتی و لافاو، دواجاریش بەنداو كاریگەری باشی هەیە لەسەر بواری كشتوكاڵی و گەشتیاری و ئاوەدانی ناوچەكە.
راشیدەگەیەنێت: یەكێك لە گرفتە سەرەكییەكانی شارەوانیمان نەبوونی ئامێری (شۆفەڵ، گرێدەر، حەفارە) یە، ناوچەكەمان ساڵانە رووداوی سروشتی لێ روودەدات، تا ئێستا ئێمە هیچ ئامێرێكی خزمەتگوزاریمان نییە، ئەگەر رووداوێكی سروشتی رووبدات، دەبێت چاوەڕێ بكەین لە شوێنەكانی دیكە ئامێرمان بۆ بێت و لێرە بە هانای خەڵك بچن و رێگری بكەن لە زیانگەیاندن بە پڕۆژە خزمەتگوزارییەكان، ئەگەر لێرە ئێمە ئامێری وامان هەبێت گرفت و كێشەی زۆرمان بۆ چارەسەر دەبێت. بۆیە داواكارین ئەو گرفتەمان بۆ چارەسەر بكەن و ناوچەكەمان دوورە دەستە، پێویستیمان بەو ئامێرانە هەیە و ناوچەكەمان رووداوی سروشتی تێدا زۆرە و ساڵانە دووبارە دەبێتەوە، دابینكردنی ئەم ئامێرانە وادەكات لەكاتی پێویست بە زووترین كات سوودی لێوەربگرین.

زۆرترین بینراو