شانازییە هەڵەكانی خێزانی كورد

ناسك واحید

خێزان هەیە لەم كوردستانەدا هەموو شانازییەكەی ئەوەیە كە كوڕی زۆری هەیە، نازانم بوونی كوڕی زۆر شانازییەكەی لە كوێدایە؟ بەرهەم و داهێنانی كوڕە زۆرەكانتان بۆ ووڵات چی بووە؟
جا كاكە ئەم برایانە دێن و وەك پلەكانی قادرمە ڕیز دەبن و شان ئەنێن بە شانی یەكەوەو دانەیەكیان وێنەكە پۆست دەكات و دەنوسێت شانازییەكانی من!!!ئاخر كام شانازی ؟!بوونی براو كوڕی زۆر ڕێكەوتێكی سروشتییە نەك دەستكەوتێكی عەقڵی و زانستی و تێكۆشان، تا شانازی پێوە بكەی یاخود تۆ تاقە خوشكێك یان دووانت هەیە بە هەمووتان دەیشارنەوە، ئیدی پێم بڵێ بوون و عەقڵی ئێوە شانازییەكەی لە كوێدایە؟!
هەڵەیەكی تری تاك و خێزانی كورد لەوەدایە زۆر بە هەڵە لە پەیوەندی كۆمەڵایەتی تێگەشتووە، لە ناو میللەتی ئێمە كاتێك ڕەخنە لە عەقڵی خێڵ  دەگرین زۆر نەزانانە دێت و دەڵێت" (مرۆڤ كائینێكی كۆمەڵایەتییە) جا باشە عەقڵی خێڵەكی چ پەیوەندیەكی بە كۆمەڵایەتی بوونی مرۆڤەوە هەیە ؟!
كۆمەڵایەتی بوون واتە تۆ مرۆڤێكی تەندروست و بەڕێز و یارمەتیدەربیت بەرامبەر هەموو مرۆڤێكی تر چ خزم بێت یاخود بێگانە .
ئەم عەقڵیەتە بچوكە وایكردووە خزمەكەی خۆی هەرچەند كەلەپووت و دوواكەوتوش بێت، ئامادەبێت كەسێكی ژیرو تێگەشتووی لەسەر ئیهانە بكات، نەك هەر ئیهانە بەڵكو ئامادەیە چەندین ساڵ درێژە بە شەڕە عەشرەت و دوژمنایەتی بدات لەپێناو تاڵێك سمێڵی پیاوە ناماقوڵەكانی عەشرەتەكەیدا ... ووشەكی مێشكە بەتاڵەكەی خزمی خۆی بە سەد فەلسەفەی بێگانە نادا، هەر ئەم عەقڵیەتەشە لە خێزانەوە تەشەنە دەكات بۆ سەرجەم  دام و دەزگاو دامەزراوە حوكمییەكان و ووڵات بەم ئاستەی ئەمڕۆ گەشتووە، تا خزمی خۆی وەستابێت هیچ ئیشێكی حوكمی هەر لە (دامەزراندن و پێدانی پلەو پۆست و ئیمتیازو پارە...) بە بێگانەیەك نادات هەرچەند موستەحەق بێت .
جا بۆیە كاتێك تۆ دەڵێیت مرۆڤ كائینێكی كۆمەڵایەتییە تێبگە كۆمەڵایەتی بوون ڕێزو باشەیە بەرامبەر مرۆڤ جا ئیتر لە هەر ئاست و نەتەوەیەكدا بێت نەك درێژەدان بە عەقڵی خێڵێكی نەزان.

بابەتى پەیوەندیدار بیروڕا

زۆرترین بینراو