كانگ فۆ توا هونەری بەهێزكردنی بوێری و خۆڕاگرییە

كانگ فۆ توا هونەری بەهێزكردنی بوێری و خۆڕاگرییە

سەردار جەبار-سۆران:

كانگ فۆ توا یارییەكی هونەری بەرگرییە دەمێك ساڵە بەردەوامی هەیە، ئەم یارییە بەشێوەیەكی گشتی كۆكراوەی یارییە هونەرە بەرگرییەكانە بەتایبەتتر لەیاریی كۆنگ فۆ و كینگ بۆكسینگ ەوە نزیكە.
مێژووی دروستبوونی كانگ فۆ توا بۆ ساڵی 1962 دەگەڕێتەوە (ئیبراهیم میرزایی) لەناو هێزە تایبەتەكان لەرۆژهەڵاتی كوردستان دایمەزراندووە سەرەتا بۆ خەڵكی سڤیل نەبووە،بەڵام كاتێ ئەفسەرەكان لەئەركەكانیان گەڕاونەتەوە بەهێواشی هەوڵیانداوە هونەرەكە بگەییێنە خەڵكی ئاسایی ،یەكەم تیپی كانگ فۆ توا  (تیپی نوحدی گاردی جاڤیدان)بووە دواتر لەتاران و شارەكانی دیكەی ئێران ئینجا لەڕۆژهەڵاتی ناوەڕاست و جیهانیش بڵاوبۆتەوە،سەرەتا لەلایەن كۆماری ئیسلامی ئێران دژایەتی دەكرا و قەدەغەكرابوو لەبەر كۆمەڵێك هەڵوێستی دامەزرێنەرەكەی، بەڵام لاوان بەنهێنی راهێنانیان دەكرد و وانەی یارییەكەیان وەردەگرت، تا ساڵی 1996 لەپەرلەمان یاسای بۆ دەرچوو بەشێوەیەكی خێرا بەجیهاندا بڵاوبویەوە، بەپێی یاسا هەموو ووڵاتێك دەتوانێ فیدراسیۆنی تایبەت بەخۆی هەبێت،لەئێستاشدا لەووڵاتانی (ئێران،ئەفغانستان،رووسیا،بولگاریا، كەنەدا ...هتد)فیدراسیۆنی تایبەت بە كانگ فۆ توا هەیە.
ئەگەر لەكوردستان باسی كانگ فۆ توا بكرێت یەكسەر بیرمان دەچێتە سەر جەبار بابیەزدین ئاخر ئەو ساڵانێكە پاڵەوان ئاسا پەرە بەیارییە هونەرە بەرگرییەكان دەدات سەدان فێرخوازی لەو بوارە پێگەیاندووە و ئەم هونەرانەی زیندوو هێشتونەتەوە، مێژووی سەرهەڵدانی ئەم یارییە دەگەڕێتەوە بۆ ساڵی 1998 یەكەم هۆڵی كانگ فۆ توا بەناوی هۆڵی (بارزان) لەشاری سۆران بووە سەرپەرشتیارەكەی جەبار بابیەزدین بووە،ساڵانە پاڵەوانیەتی جۆراوجۆر لەشارەكانی كوردستان بەڕێوەدەچێت هاوكات كوردستانیش خاوەن فیدراسیۆنی تایبەت بەخۆی هەیە و سەرۆكی فیدراسیۆنەكەش جەبار بابیەزدین رەسوڵە.
بابیەزدین 36 ساڵە بەبێ پچڕان لەڕێی هونەری بەگرییەوە خزمەتی خۆی و ئارەزوومەندانی ئەم یارییانە دەكات، وەك خۆی دەڵێت لەدوانزە ساڵییەوە لەسەر دەستی براگەورەكەی جەلال بابیەزدین ـەوە وانەی وەرگرتووە رێگای بەردەمی پەیتا پەیتا واڵابووە ، جەبار خاوەنی چەندین دەسكەوت و شانازییە لەهونەرە بەرگرییەكان بەگشتی و كانگ فۆ توا بەتایبەتی، وەلێ گەورەترین شانازی لای ئەو لەملكردنی ئاڵای پیرۆزی كوردستان بووە لەپاڵەوانیەتی جیهانی لەمۆسكۆی پایتەختی رووسیا ، ئەو مامۆستایەی كانگ فۆ توا خاوەنی 21 بڕوانامەی جۆراوجۆرە لەو ژمارەیە 8 دانەیان جیهانین تایبەتە بەیاریی هونەرە بەرگرییەكان ، ئێستا بابیەزدین خۆی پێشڕەو و سەرۆكی فیدراسیۆنی كانگ فۆ توای كوردستان ـ عێراقە، هاوكات لەزۆربەی فیدراسیۆنە جیهانییەكان ئەندامە و پەیوەندییەكی پتەوی لەگەڵیان هەیە .
جەبار بابیەزدین بەم شێوەیە لەسەر هونەرەكەی و دەسكەوتەكانی دێتە گۆ :پاڵەوانیەتی  كانگ فۆ توا هەرساڵە و دەبێتە میوانی ووڵاتێك ،یەكەمین پاڵەوانیەتیش لەمۆسكۆی پایتەختی رووسیا بەڕێوەچوو ساڵی 2013 تێیدا 21 ووڵات بەشدارییان كردبوو ، لەوێ من و دوو یاریزانی كورد  بەفەرمی بانگهێشتكرابووین بەئاڵا و سروودی نەتەوەیمان مەدالیایەكی زیو و دوو مادالیای بڕۆنزمان لەگەڵ خۆمان هێنایەوە . 
كانگ فۆ توا زیاتر گرنگی بەهونەری بەرگری دەدات لەهەمانكاتدا دەشێت بڵێین كۆكراوەی هەموویانە ،چوون زۆرترین بزاڤ و تەكنیكی هەیە لەناو هونەرە جەنگییەكان پێداگری لەبوونی جەستەیەكی بەهێز و رۆحیەتی پاڵەوانانە دەكات و مەشقەكانی سەختترینن لەبەر ئەو هۆیە جیاوازانە و زیاتر هونەرێكی جەنگی تایبەت بەهێزە تایبەتەكانن ،هەڵبەتا لەناو هێزی پێشمەرگەی كوردستانیش شوێنی خۆی كردۆتەوە و درەوشاوەتەوە . 
لەبارەی یاساكانی كانگ فۆ توا بابیەزدین رایگەیاند:هەر یارییە و یاسای تایبەت بەخۆی هەیە ،بەڵام یاسای سەرەكی پەروەردەكردنی جەستەی یاریزانە مەرجە خاوەن جەستەیەكی بەهێزبێت، هەڵبەت پەروەدەكردنی رۆحیش لەگەڵیدا پێویستییە و تەنها بەرگری لەخۆكردن رێگەپێدراوە ، ئەم یارییە پێداویستی زۆری پێویستە و خەرجی زۆر دەكەوێت .
كانگ فۆ توا واتاكەی بەم شێوەیە :-
كانگ واتە زانایی ، فۆ واتە رێگا ، توا واتە هاتن ،بەشێوەی گشتی واتە" هاتن بۆ رێگای زانایی" . 
جەبار زیاتر دەڵێت : كانگ فۆ توا هونەری بەهێزكردنی خۆڕاگری و باوەڕ بەخۆبوونە ، هەموو مرۆڤێك بێ رەچاوكردنی رەگەز دەتوانێت رێنوێنی ئەم هونەرە بكرێت لەتەمەنی 7 تا 70 ساڵی ، هەر كەسێك بەپێی ئاستی خۆی مەشقی تایبەت وەردەگرێت ، هاوكات لەناو هێزی پێشمەرگەی كوردستاندا رۆڵی تایبەتی هەبوو تەنانەت ئەو ساتە لەیاد ناكەم لەبەردەم سەرۆك بارزانیدا چەند نمایشێكمان كرد بەهێزی پێشمەرگەمان بۆی دەرخست ئەویش پێشوازییەكی گەرمی لێكردین .
سەرۆكی فیدراسیۆنی كانگ فۆ توای كوردستان ئاماژەی بۆ ئەوەشكرد :لەسەرانسەری جیهان هەزاران كەس شوێن كەوتەی ئەو یارییەن ،لەهەمانكاتدا لەكوردستان سەرجەم راهێنەرەكان دەرچووی هۆڵی (بارزان)ـن بەشانازییەوە، دەتوانم بڵێم كەم ماڵ لەسنووری ئیدارەی سەربەخۆی سۆران هەیە منداڵێك یان دووان لای ئێمە مەشقی وەرنەگرتبێ
دەیان پاڵەوانیەتی لەهەرێمی كوردستان و عێراق ئەنجامدراوە ، سەرەتا لەهەولێر دوواتر بەغدا لەسەر ئاستی نێودەوڵەتیش ساڵی 2015 لەهەولێر و ساڵی 2018 لەسۆران ، ساڵی 2020 لەسەرانسەری كوردستان یاریزان بەشدارییان كرد ژمارەیان 70 یاریزان بوو بە16 تیپ پشكدار ببوون ، هەروەها ساڵی 2021 پاڵەوانەتیەكی دیكەمان لەهەولێر ئەنجامداوە . 
ئەو پاڵەوانەی كانگ فۆ توا تیشكی خستەر ئەوەی :هەرگیز یاریی تایكواندۆم نەكردووە تەنها ساڵێك لەپاڵ كۆنگ فۆ یاریی كینگ بۆكسینگ ـم كردووە پشتدێنی رەشم لەلیژنەی ئۆڵۆمپی بەغدا وەرگرتووە، ئەوكات بانگهێشتی ریزی هەڵبژاردەی عێراق كراین ،وەلێ بەهۆی بوونی جەنگ لەو ووڵاتە نەمانتوانی بڕۆین .
جەبار بابیەزدین بەم شێوەیە گوازرشت لە دوا پەیامی خۆی دەكات: گەر تەمەن رێگا بدات و خودا پاڵپشت بێت هەوڵی جددیمان لەسەر ئەوەیە لاوانی ئێمە ببەین لەنێو پاڵەوانانی بدرەوشێنەوە ،كۆمەڵێك پڕۆژەی گرنگم لەبەردەستە لەداهاتوویەكی نزیك لەسۆران ئەنجامیدەدەین، چونكە من ئێرە بەلانكەی هونەرە جەنگییەكان دەزانم .

زۆرترین بینراو