كریشما جەلال: كاری سەربەخۆ هەستێكی زۆر خۆش بە مرۆڤ دەگەینێت

كریشما جەلال: كاری سەربەخۆ هەستێكی زۆر خۆش بە مرۆڤ دەگەینێت

لە ماوەی سێ رۆژی ڤیستیڤاڵی شانۆی سەر شەقام لە سۆران، بەژداربوان و میوانانی ئەم ڤیستیڤاڵە لە یەكێك لە هۆتێلەكانی هاوینە هەواری بێخاڵ دەمانەوە، لەوێ هەموویان دوور یا نزیك ئاشنای خاتوونێك دەبوون كە بە هەموو هەوڵ و توانای خۆی كۆششی دەكرد بۆ دابینكردنی پێداویستییەكانی میوانەكان و سازكردنی كەشێكی خۆش، بۆ ئەوەی هەمویان هەست بە مورتاحی بكەن. ئەو خاتوونە ناوی كریشما جەلال، خاوەنی هۆتێڵی مازیار بوو، وەكو سەربازێكی وون خزمەتی ئەم ڤیستیڤالەی دەكرد.

دیدار:رۆژان قیاس

ویستمان لە نزیكەوە گوێ لە ئەزموونی ئەم  خاتوونە چالاكە بگرین، ئەو بەم جۆرە باسی خۆی كرد" دەمەویست لەسەر پێی خۆم بوەستم و سەرچاوەیەكی داراییم هەبێ، لە هەمان كاتدا هاوكاری هاسەرەكەم بكەم لە بەرێوەبردنی خیزانەكەمان، ئەوەبوو چەند ساڵێك پێش ئێستا سەردانی بێخاڵم كرد بیرۆكەی سازكردنی هۆتێلێكم دانا هۆتێلی مازیارم دامەزراند ئەمە بووە دەروازەیەكی باش  بۆم بۆ هاتنە نێو كاری بزنسی".
لە چاوەكانی خاتوو كریشما ماندوویەتییەكی زۆر بەدی دەكرا، بەڵام ئەو زۆر بە گروتینەوە كارەكانی دەكرد و بەو پەڕی روو خۆشییەوە پێشوازی لە میوانەكانی دەكرد و نەی دەهێشت هەست بەو ماندوویەتییەی بكرێت، لە بارەی هۆكاری ئەو ماندوویەتیەی كریشما گووتی" بۆ ئافرەت زۆر سەختە هەم وەك هاوسەر و هەم وەك خاوەن كار، ماندوو دەبم و جاری وا هەیە وەڕەز دەبم، بەڵام هیچ كات واز ناهێنم لە كارەكەم و چێژ لەو ماندوو بونەم دەبینم و زیاتر هەوڵ دەدەم لەسەر پێی خۆم بوەستم، هەر كاتێك پێویستبوو دوای ماندووبوون دەحەسێمەوەو دواتر دەگەڕێمەوە سەر كارەكەم".
دیاربوو ئەو خاتوونە بە قۆناغی زۆر سەختدا تێپەڕیبوو تا گەشتبووە ئەم كاتەی ئێستا، ئەو گووتی" لە سەرەتادا سەختی زۆرم بینی، كۆمەڵگە بە ئاستێكی زۆر دژایەتی دەكردم و بەربەستی بۆ ساز دەكردم، بۆمن لایەنە ماددیەكە ئەوەندە زەحمەت نەبوو بەرامبەر بەو هەموو دژایەتیەی كۆمەلگە بەرامبەرم دەكرا، هەتا لە مزگەوتەكان باسم كرابوو بە شتێكی نا رەوا دانربوو، بەڵام من نەوەستام و بەردەوام بووم، و هاوسەرەكەم و خێزانەكەم پشتگیرییەكی زۆریان دەكردم و ئەمەش وای كرد زیاتر بەهێز بم و  روبەڕووی بەربەستەكان ببمەوە، نەهێلم تێكم بشكێنن".
خاتوو كریشما پێی وایە كاری سەربەخۆ زۆر گرنگە بۆ ئافرەت، ئەو زیاتر گووتی" ئافرەتی چالاك و خاوەن كار زۆر بەهێزە و زۆر بە گرنگی دەبینم ئافرەتانی كوردیش دەست بە كاری خۆیان بكەن و هەوڵ بدەن لەسەر پێی خۆیان بوەستن، بۆ ئەوەی بەرامبەر كۆمەڵگە بوەستن و روبەڕووی دابونەریتە كۆنو پیاو سالارییەكان ببنەوە، و كاری سەربەخۆ هەستێكی زۆر خۆش بە مرۆڤ دەگەینێت، و ئارامییەكی رۆحی زۆر تایبەت دروست دەكات".

 

زۆرترین بینراو