كێ و چۆن دەبێتە رابەر

غەفوور عەبدولڵا

بابەتی دیاری كردنی كەسێك بە رابەری (مەرجەع)ی كورد، لە چەند رۆژی رابردوو بۆتە بابەتێكی سەیری نێو هەندێك لە كەناڵەكانی راگەیاندن، وەك باسیان لێوە كردووە پارتی كار بۆ ئەوە دەكات كاك مەسعود بارزانی وەك رابەری (مەرجەع)ی كورد بناسێنێت، ئەمە لە كاتێكدایە لە هیچ كەس و دامەزراوە و راگەیاندنی پارتی گوێ بیستی ئەم بابەتە نەبوومە، تەنها لایەنەكانی ركابەری پارتی كاریان لەسەر ئەم بابەتە كرد، كە بە سەرقاڵكردنی خەڵكی دەزانم و سیناریۆیەكە بۆ ئەوەی شەقام بە شتێكەوە مەشغوڵ بكەن كە لە بنەڕەتدا بوونی نییە.
جارێ كاك مەسعود بارزانی بە ویستی ناحەزانی بێت یا نە ئێستا رابەرە، بڕیارە چارەنووسسازەكان كە زۆر هەستیارە و كەسی دیكە ناوێرێ بەرپرسیارییەتییەكەی هەڵگرێت، لە لای جەنابیانەوە دەدرێت.
 شاندی دیپلۆماسی باڵای وڵاتان بۆ هەر كارێك هاتبن و هەر مەبەستێكیان بووبێت، هەر كەسێكیان بینیبێت، تا خودی سەرۆك بارزانییان نەدیتبێت یا هەڵوێستی نەزانن ئاسوودە نابن و بڕیار نادەن.
لە كاتێكدا كاك مەسعود بارزانی جگە لە بەرپرسیارییەتی سەرۆكایەتی پارتی دیموكراتی كوردستان، ئەركی فەرمی حكومی نییە، ئەی خێرە هەمووان بۆ بڕیاری كۆتایی دەگەرێنەوە لای بەرێزیان؟.
ئەوەی كەسایەتییەك دەكات بە رابەر هەڵوێست و رابردووەكەیەتی، نەك پف دانی، بەشێكی هەرە زۆری سەرۆك حزبەكان ئەوەندە كوورسییان خۆش دەوێت كە رابەرایەتی كردنی حزبەكەیان نادەنە ئەندامانی دیكەی نێو حزبەكەی خۆیان، واتە ئەگەر دەستڵاتیان هەبووایە نەك رابەرایەتی حزبەكەیان و باشووری كوردستان بەڵكوو هی هەر چوار پارچەی كوردستانیان بە باڵای خۆیان دەدوورین بۆ نموونە:
لە رۆژی دامەزراندنی یەكێتییەوە خوا لێخۆشبوو مام جەلال سكرتێر بوو تا ئەو كاتەی گیانی سپارد، ئێستاش كوڕەكەی و برازاكەی كورسییەكەیان كردووە بە دوو لەت لەسەر دانیشتوون.
جەنابی نەوشێروان مستەفا، بەهۆی ئەوەی نەیتوانی ببێتە رابەر لە ناو یەكێتی گۆڕانی دروستكرد تا چووە بەر دڵۆڤانی یزدان، دوای ئەویش كوڕەكانی بوونە خاوەن هەموو ملك ماڵی بزووتنەوەكە و بڕیاری یەكلا كەرەوە دەدەن.
عەلی باپیر، لەوەتەی كۆمەڵی ئیسلامی دامەزراند و دواتریش بوونەتە كۆمەڵەی دادگەری هەر بەخۆی ئەمیر و رابەر بووە و لەگەڵ زاواكەی بڕیاری كۆتایی دەدەن. بۆ كەسی شیاوتر لە نێو كۆمەڵی ئیسلامی و دادگەری نەبووە تا شوێنی عەلی باپیر بگرێتەوە. چەندین كادیری باڵای ئەم حزبە بۆچی وازیان هێنا؟.
یەكگرتووی ئیسلامی یەك جار ئەمیریان گۆڕی و بە پەلە ئەمیرەكەی پێشووتریان كردەوە بە رابەری خۆیان، بۆ خێرە یەعنی یەكگرتووی ئیسلامی بەو هەموو هات و هاوارەی لە كەنالەكانی راگەیاندن دروستی دەكەن كەسێكی دیكەیان نەبوو ببێت بە رابەریان؟.
لەو رۆژەی حزبی سۆسیالیست دیموكراتی كوردستان دروست بووە، كاكە حەمە سەرۆكی ئەم حزبەیە و براكەشی كاك عەبدولڵا یا ئەندام پەرلەمان بووە یا وەزیر، بۆ ئەمە چی دەڵێن؟.
قادر عەزیز، كە زانی چیتر وەك رابەری حزبی زەحمەتكێشان قبوڵی ناكەن حزبێكی دیكەی دامەزراند، دواتریش بووە ئەندامی مەكتەبی سیاسی یەكێتی، زەحمەتكێشانی لەت و پەت كرد.
بزووتنەوەی ئیسلامی دۆخی لە حزبەكانی دیكە وێرانتر نەبێت باشتر نەبووە.
نەوەی نوێ بەهۆی حەزی رابەرایەتی كردنی سەرۆكەكەیان، لە پەرلەمانی عێراق و كوردستان لەت بوون، تۆماری ڤیدۆییان لەسەر یەكتری بڵاو كردەوە.
هەموو ئەو كەسانە تا ئەو شوێنە خەمخۆر و دڵسۆز بوونە كە بەرژەوەندی كەسییان پارێزراو بووە، دواتریش لە رێگەی بەكرێ گیراوانیان تۆمەتی نارەوا دەدەنە پاڵ كەسانی شایستەتر لە خۆیان.
سەرۆك بارزانی لە ناوەندە دیپلۆماسییەكانی هەرێمی و جیهانی وەك رابەری كورد ناسراوە، ئەوەی وایكردووە سەرۆك ببێتە خاوەن ئەو پێگەیە، دژایەتییەكانی ناوخۆی كە بۆ كورسی و حەسادەت پڕ بوونە لە رق و كینە نەبووە، بەڵكوو هەڵوێستی جوامێرانە، ژیرانە، بوێرانە و دوور بینانەی جەنابیان وای كردووە ببێتە كەسایەتییەك كە وەك رابەر مامەڵەی لەگەڵ بكرێت.
كاك مەسعود بارزانی لە هەر پێگەیەكەوە بێت خزمەت دەكات، خۆشی شانازی بە پێشمەرگە بوونی خۆیەوە دەكات.
بۆیە ئەم هات و هاوارە لە خۆڕاییە و ماندوو كردنی خۆتانە، دەستتان كەشف بووەو چیتر مرۆڤی ژیر بەم نزایانەتان ناڵێن ئامین. 

 

بابەتى پەیوەندیدار بیروڕا

زۆرترین بینراو