نیان سوبحی: وێنەكێشان رەنگدانەوەی رووحە بۆ وێنەكێش

نیان سوبحی: وێنەكێشان رەنگدانەوەی رووحە بۆ وێنەكێش

محەمەد ئامۆكەیی- زاری كرمانجی

نیان سوبحی تەمەن 20 ساڵ دانیشتووی قەزای رواندز و قوتابی قۆناغی دووەمی بەشی شێوەكاری كۆلێژی هونەرە جوانەكانی زانكۆی سەڵاحەددین، لە دیمانەیەكی زاری كرمانجی دا، هونەری وێنەكێشان بە پەیامێكی بێ دەنگ بۆ كۆمەڵگە ناو دەبات و دەڵێ‌"هونەری وێنەكێشان دەربڕینی هەست و سۆزە لەلایەن وێنەكێش و گەیاندنی پەیامێكە بە شێوەیەكی بێدەنگ بۆ كۆمەڵگە"، ئەوەش دەڵێ‌"وێنەیەكی بێ گیان، ئەتوانێ ناخی وێنەكێش ئاسوودە بكات و خۆراكێكیش بێ بۆ چاو و رووحی بینەر چێژی لێ ئەبینێت، بۆ هەر تاكێكی كۆمەڵگە هونەری وێنەكێشان گرنگە جا بینەر بێت یان شێوەكار، جوانییەك ئەبەخشێت بە بوونیەتی مرۆڤ و دەربڕینی هەستەكان تێیدا، كلتوور و داب و نەریتی هەر كۆمەڵگەیەك شێوازی وێنەكە ئەگۆڕێت و بە كێشانی وێنەیەكی كولتوری وڵاتێك، دەكرێ خەڵكی وڵاتانی تر ئاشنا بكات بە شێواز و ژیانكردنی كۆمەڵگایەكی تر، هەر وێنەكێشێك تایبەتمەندی و هەستی خۆی هەیە بۆ كێشانی وێنە و دەربڕینی، ئەگەر هەست و سۆز نەبێت وێنەیەكی پۆرترەیتی ئاسایش بە شێوەیەكی جوان ناكێشرێت، بۆیە پێویستە وێنەكێش بە هەست و وزەیەكی زۆرەوە هەوڵی وێنەكێشان بدات تا بتوانێ وێنەیەكی دروست بكات كە ڕەنگدانەوەی رووح بێت".
نیان هەر لە منداڵییەوە خولیاو حەزی بۆ وێنەكێشان هەبووەو دەڵێ"ماڵەوە هەمیشە پاڵپشتم بوونە بەتایبەت باوكم، ئەو هاندەرێكی گەورە بوو كە روو بكەمە كۆلێژی هونەرە جوانەكان و لەوێدا پەرە بە بەهرەكەم بدەم و كار لەسەر ئامانجەكانم بكەم"، نیان باس لەوەش دەكات كە رۆژ بە رۆژ حەزی بۆ وێنەكێشان زیاتر دەبێ و دەڵێ‌"ئەو دوایانە تەنها وێنەی هێلكاریم ئەكێشاو زیاتر پۆرترەیت، ئێستا لەگەڵ ئەویشە كار لەسەر تابلۆش ئەكەم زیاتر بە رەنگی ئەكریلیك، چونكە دەمەوێت زۆربەی جۆرەكانی وێنەكێشان تاقی بكەم"،
نیان ئەوەش ناشارێتەوە وەك هەر كچێكی تر، بەهۆی كارەكەییەوە توانجی لێدراوەو بەتایبەت خەڵكانێك پێیان وایە كە نیگاركێشان حەڕامە، بۆیە دەڵێ‌"تا ئێستاش خەڵكانێك هەن بەچاوێكی تر سەیری هونەر دەكەن و پێیان وایە وێنەكێشان حەڕامە، بەڵام من پێم وایە ئاینی ئیسلام وا ناڵێت، بەڵكو خەڵكانێكی بێ ئاگا لە ئیسلام ئەو جۆرە قسانە دەكەن، ئەگەر بتپەرستی سەردەمێك پەیكەری بۆ چاككراوەو وێنەی بۆ دروستكراوە، ئەو سەردەمە زۆر دەمێكە كۆتایی پێهاتووەو ئێستا ئێمە لەسەدەی 21 دەژین، بۆیە لەهەر سەدەیەك هونەر بە جۆرێكی تر خۆی بینیوەتەوەو لەئێستادا بتپەرستی بوونی نییەو وێنەكێشان و پەیكەرەكان بە مەبەستی جوانكاری بەكاردێن، بەڵام بەداخەوە تاكو ئێستاش خەڵكانێك هەن هێشتا لە سەردەمی 1400 ساڵ بەر لەئێستا ماونەتەوەو پێمان دەڵێن وێنە مەكێشە، بێ ئاگا لەوەی كە من دەمەوێت لە رێگەی وێنەكانم، باڵا دەستی خودا نیشان بدەم".

زۆرترین بینراو