هۆکارەکانی ئازاری پشت له‌ کاتی سکپڕی و دوای منداڵبوون چییە؟ 

هۆکارەکانی ئازاری پشت له‌ کاتی سکپڕی و دوای منداڵبوون چییە؟ 

زیاتر له‌ ( % ٥۰ ) ئه‌و خانمانه‌ی دووگیانن،  تووشی پشت ئێشه‌ ده‌بن و زۆربه‌یان دوای له‌ دایکبوونی کۆرپەکەیان ئازاره‌که‌یان که‌مده‌بێته‌وه‌ یان نامێنێت،  له‌ هه‌مان کاتدا به‌شێکی خانمان پاش منداڵبوون تووشی ئازاری پشتی ده‌بن یاخود زیاتر ئه‌بێت۰ 
گرنگترین هۆکاره‌کانی ئازاری پشت کاتی سکپڕیدا، ئەمانەن :

۱ ـــ زیاد بوونی کێش : کاتی دووگیانی ئاسایی خانمان ( ۱۳ ـــ ۲۷ ) کیلۆگرام کێشیان زیاتر ده‌بێت، ئه‌مه‌ش فشارێکی زیاتر له‌ سه‌ر بڕبڕه‌کانی پشت دروست ده‌کات ۰ 
۲ ـــ گۆڕانی هۆرمۆنه‌کان : هۆرمۆنی ڕێلاکسین ده‌ڕێژرێت بۆ خاوبوونه‌وه‌ی به‌سته‌ره‌کانی ناوچه‌ی حه‌وز و نه‌رمبوونی جومگه‌کان بۆ ئاماده‌ بوون بۆ منداڵبوون،  هه‌مان هۆرمۆن ده‌بێته‌ هۆی بێهێزبوونی به‌سته‌ر و جومگه‌کانی بڕبڕه‌ی پشت ۰ 
۳ ـــ گۆڕانی خاڵی فشاری له‌ش،  به‌ هۆی گه‌وره‌ بوونی قه‌باره‌ی سکه‌وه‌،  پشت زیاتر به‌ره‌و پێشه‌وه‌ ده‌چه‌مێته‌وه‌ ته‌نانه‌ت بێ ئه‌وه‌ی خۆت بنووشتێنیت. 
٤ ـــ جیابوونه‌وه‌ی ماسولکه‌کانی دیواری سک له‌ یه‌کتر بۆ ڕێگه‌دان بۆ گه‌وره‌بوونی قه‌باره‌ و کێشی منداڵدان که‌ ده‌بێته‌ هۆی زیاتر بوونی پشت ئێشه‌ ۰ 
٥ ـــ دڵه‌ڕاوکێ و قه‌له‌قی : له‌ کاتی سکپڕی زیاتر ده‌بێت به‌ هۆی ترس و چاوه‌ڕوانی له‌ دایک بوونی مناڵێکی تازه‌وه‌ ۰ 
٦ ــــ که‌می کالسیۆم و ڤیتامین ( D ) و مه‌گنسێوم : به‌ هۆی دروست بوونی کۆرپه‌له‌وه‌ و گرنگی نه‌دان به‌ خواردنی ته‌ندروسته‌وه‌ ۰ 
۷ ـــ زیادبوونی نیشانه‌کانی کێشه‌ی ئینزلاق و نه‌خۆشیه‌کانی تری جومگه‌کان ئه‌گه‌ر پێش سکپڕی هه‌بوو بێتن و ڕه‌نگه‌ ده‌ست نیشان نه‌کرابن یا وه‌ک پێویست چاره‌سه‌ر نه‌کرابن ۰ 
۸ ـــ هه‌وکردنی جومگه‌ی حه‌وز : زۆر باوه‌ لە کاتی سکپڕیدا ۰ 
۹ ـــ وه‌ستانی زۆر به‌ پێوه‌ و هیلاکی و که‌می جوڵه‌ و ئه‌نجام نه‌دانی وه‌رزش ۰ 

شێوازی چاره‌سه‌رکردنی :

ـــ زیاترکردنی جووڵه‌ و رۆیشتن به‌ پێ و ئه‌نجام دانی وه‌رزشی گونجاو ڕۆژانه‌ یاخود یۆگا ۰ 
ـــ ده‌ست نیشان کردن و چاره‌کردنی که‌می ڤیتامین و کانزاکان له‌ ڕێگه‌ی خۆراکی ته‌ندروست و گونجاوه‌وه‌ ۰ 
ـــ به‌کارهێنانی حه‌پی پاڕاسیتامۆڵ لە کاتی ئازاری زۆر و به‌ بڕی که‌م .  
--- پابه‌ند بوون به‌ هه‌ندێ ڕێنمیایی پزیشکییه‌وه‌ سه‌باره‌ت به‌ شێوازی پاڵ که‌وتن "کە باشترە لەسەر لا بێت"  و دانیشتن و وه‌رزش و شت هه‌ڵگه‌رتنه‌وه‌. 
----  لەپێکردنی پێڵاوی پاژنە نزم و تەندروست و دوورکەوتنەوە لە پێڵاوی بەرز، باشتریشە فلاتی تەواو نەبێت،  کە ئەمە یارمەتی  دابەشبوونی کێشی زیادەی لەش دەدات بە یەکسانی. 
--- هەڵگرتنی شتومەکی قورس بە شێوەیەکی یەکسان لەهەردوولاوە ، بۆ ئەوەی فشار نەخاتە سەر لایەک. 
--- بەکارهێنانی پاکی سارد و گەرم بۆ شوێنی ئازارەکە ، کە نەخۆشەکە خۆی دەتوانێت هەردووکیان تاقیبکاتەوە، سوودی لە کامیان بینی، ئەوە بەکاربێنێت. 
---- بەکارهێنانی چارەسەری تەواوکەر یاخود ئەڵتەرناتیڤ میدیسن، ئەگەر ئازارەکە بە ڕێگاکانی  کە چارەسەر نەکرا، وەکو : دەرزی ئاژنین ، درای نیدڵینگ، کارێۆپراکتیک، چارەسەری فیزییایی ، کە ئەمانەش دەبێت کەسانی پسپۆڕ ئەنجامیبدەن. 
چ کاتێک  پێویسته‌ سه‌ردانی پزیشک بکه‌یت بۆ پشت ئێشەکەت :
ـــ بوونی ئازارێکی زۆر به‌ به‌رده‌وامی و بۆ ماوه‌ی چه‌ند ڕۆژێک که‌ به‌ پشوو دان نه‌ڕوات یان نه‌هێڵێت بخه‌ویت ۰ 
ـــ بوونی ئازار یان هاتنی ئازاره‌که‌ بۆ سمت و قاچ و پێ ۰ 
ـــ بوونی سڕ بوون و ته‌زین و هاتنی ته‌زوو و مێروله‌کردن به‌ په‌نجه‌ و پێ و قاچ دا ۰ 
تێبینی : وێنەکە هەندێک لەو وەرزشانەیە کە دەتوانیت بیکەیت لە کاتی ئازاری پشتدا لەکاتی سکپڕی ، یەکێک لەوانە سکوات کردنە، بەڵام ئاگادار بە وەرزش دەبێت بە شێوەیەکی ڕێک و ڕۆژانە ئەنجامبدرێت، دەنا زەرەری زیاترە لە سوود . 

 

* پسپۆڕی بێهۆشکاری و ئازارشکاندن 
شاره‌زا له‌ چاره‌سه‌ری فه‌قه‌رات و نه‌خۆشیه‌کانی جومگه‌کان بێ نه‌شته‌رگه‌ری.

زۆرترین بینراو