وەڵامێكی زانستی بۆ هەڵوێستی یەكێتی 

مافناس سەنار شێرۆكی

مافناس سەنار شێرۆكی
 شارەزا لە بواری هەڵبژاردن و راپرسی


بابەتێك لە زۆرێك لە میدیاكان بڵاو بۆتەوە سەبارەت بەوەی كاری تەزویر یا یاریكردن بە دەنگەكان كراوە، كاتێك ئەو بابەتانەم خوێندەوە لە سۆنگەی شارەزایی خۆم بۆ ئامێرەكانی هەڵبژاردن و شێوازەكانی رێگریكردن لە هەموو جۆرە دەستێوەردان لە ئامێرەكە پێویست بوو، وەڵامێك بۆ بابەتەكە و روونكردنەوەیەك بێت، بۆ ئەو كەسانەی شارەزاییان لەو ئامێرانەوە نییە، كە ئەمجارە لە هەڵبژاردن بە شێوەیەكی جیا لە هەڵبژاردنەكانی رابردوو بەكار هاتبوون.
لە نووسراوەكەدا هاتووە:" لە سنووری بازنەكانی هەڵبژاردنی پارێزگای هەولێر ژمارەیەك ساختەكاری رێكخراو ئەنجامدراوە، بەهۆیەوە ئەنجامی دەنگدانی بەشێك لە كاندیدەكان گۆڕانكاری بەسەردا هاتووە".

هەروەها نووسراوە " یەكێك لە ساختەكارییەكانی پارتی بریتی بووە لە گواستنەوەی سنووری دەنگدانی هەزاران كادیری خۆی لە بازنەیەك بۆ بازنەیەكی دیكە بە ئامانجی دەرچوواندنی ژمارەیەك كاندید بە دەنگی دەنگدەرانی بازنەكانی دیكە".
وەڵام: ئەو بابەتە هیچ جۆرە ساختەكارییەكی تیا نییە تەنانەت جۆرێكە لە ململانێی هەڵبژاردن بە تایبەتی كە یەكێتیش كۆمەڵێك دەنگی ناوچەكانی چوار قووڕنەی گواستبوویەوە ئەو شوێنەی ئێمە كاری ئەنجامدانی هەڵبژاردنمان لێ‌ ئەنجامداوە، واتە ئەگەر هاتوو بابەتێكی بەو شێوەیە هەبێت لە رووی لیستی دەنگدەرانی هەر ناوچەیەك رێگری لەو بابەتە ناكرێت، بە مەرجێك تەواوی رێكارەكانی تایبەت بە تۆماری بایۆمەتری خۆی تێپەر كرد بێت، بە پێچەوانەوە ئەگەر هاتوو كاری بایۆمەتری ئەنجام نەدرابیت بە هیچ شێوەیەك ناتواندرێت دەنگەكان لە بنكەیەك بۆ بنكەیەكی تر بگوازرێتەوە نەخاسما بە نیاز بیت لە بازنەیەك بۆ بازنەیەكی تر بگوازرێتەوە، لەبەر ئەوەی داتاكان بە شێوەیەك رێكخراوە كە ئامێری VVDتایبەت بە زانیارییەكانی بایۆمەتری پەیامێكت پێ‌ دەدات كە ئەو دەنگدەرە لێرە نییە یان ناو نیشانی بنكەكەت پێ‌ دەدات، تەنانەت زۆر جاران كاتێك دەنگدەرێك ناوی نەبوایە لە رێگەی ئەو ئامێرەوە رێنوێنی شوێنی دروستی خۆمان دەكرد.
* تێبینییەكی دیكەی یەكێتی ئەوە بووە" جۆرێكی دیكە لە ساختەكاری رێكخراو دەرهێنانی میمۆری ئامێرەكانی دەنگدان بووە بۆ ماوەی چەند كاتژمێرێك، بە تایبەت لەسنووی قەزاكانی سۆران و بازنەی یەكی هەولێر".
وەڵام: بابەتی دەرهێنانی میمۆری ئامێرەكان دروست نییە چوون قفلی ئامێری ئەلكترۆنی داخراوە بە قوفلێك كە لە كۆمیسیۆن تۆمار كراوە كەس مافی دەستكاری كردنی ئەو قوفلەی نییە، تەنانەت پاش كۆتایی هاتنی هەڵبژاردن هەموو ئەو ئامێرانە بە شێوەیەكی تۆڕی بەستراو بە مانگی دەستكرد بەستراونەوتەوە هەموو جۆرە دەنگدانێك بە چڕكە تۆمار دەكرێت تەنانەت ئەگەر گریمانەی ئەوە بكەین، بابەتەكی لەو جۆرە هەبێت هیچ جۆرە سوودەكی لێ‌ وەرنەگیراوە.
رەخنەیەكی دیكەیان بریتییە لەم خاڵە و تێیدا هاتووە " زۆربەی ئاڵوگۆڕەكانی دەنگەكانی پارێزگای هەولێر بۆ دوورخستنەوەی هەرێم كەمال ئاغا و فەیسەڵ كەریم خان بوون".
وەڵام: ئەو بابەتە دیار نییە ئاخۆ مەبەست لە ئالوگۆڕكردن چییەو چۆن ئاڵوگۆڕ كراون چوون ناكرێت دەنگەكان لە بنكەیەك بۆ بنكەیەكی تر بگوازرێنەوە تەنها لە رێگەی داتای مەركەزی نیشتمانی كۆمیسیۆن نەبیت ئەوەش بە گرتنەبەری رێكاری دیاری كراو لە كاتی بایۆمەتری نەبێت" .
زیاتر گووتراوە " تا نیوەڕۆی دووشەممە، 11ی ئۆكتۆبەر، زیاتر لە 161 سندوقی دەنگدان لە سنووری پارێزگای هەولێر شاردراوەتەوە، بەڵام بەهۆی فشاری كۆمسیۆن و لایەنێكی سیاسی وابڕیارە ئەو سندوقانە بگەڕێندرێنەوە بەغدا".
وەڵام: وەك رێكارێكی سیستماتیك و ئامادەكاری كراو بۆ هەڵبژاردنەكان لە دوای كات ژمێر6 و راكێشانی راپۆڕتی تایبەت بە سندوقەكانی دەنگدان لە هەردوو ئامێری VVD و ئامێری PCOS كە خۆی لە راپۆڕتەكانی ئەنجام و راپۆڕتی باركۆد دەبینێتەوە تەسلیم بە لایەنە سیاسییەكان دەكرێت دواتر بە ئامێری سێیەم بە ناوی RTSلە رێگەی تۆڕی ئینتەرنێت و مانگی دەستكردەوە رەوانەی مەركەزی نیشتمانی كۆمیسیۆن دەكرێت بە لە بەردەستدا بوونی راپۆڕتەكان هەروەها راپۆڕتی ژمارەی 41 تەنانەت راپۆڕتی ژمارە 42ش دوای جیاكردنەوەی بە شێوەی دەستی تەنانەت ئەگەر سندوقی دەنگەكان نەمێنن هیچ كاریگەرییان لەسەر ئەنجامی دەنگدانەكە نابێت، تەنانەت ئەگەر هەموو سندوقەكان بسووتێندرێن داتاكانی هەڵبژاردن رەوانەی ناوەندی نیشتمانی كراون، سەرەڕای ئەوانەش لە هەردوو ئامێرەكە داتاكان پاشكەوت كراون واتە دەبێت ئەو داتایانەی بە رێگەی مانگی دەستكرد رەوانە كراون دەبێت یەكسان بن.
لە بەشێكی دیكە لە قسەكانیان هاتوو" جگە لە چەند جۆرێك ساختەكاری رێكخراو لە هەمانكاتیشدا لە ژمارەیەك لە بنكەكانی دەنگدان ئامێرەكان براونەتە دەرەوەو ژمارەیەكی سندوقی دەنگدان كراوەتەوە".
وەڵام: سەبارەت بە برنە دەرەوەی ئامێرەكانی دەنگدان، ئەو بابەتە ئەگەر هەبێت كاریگەری نەرێنی لە سەر دەنگدانەكە دەبێت، واتە دەبێتە هۆكاری پچڕانی ئامێرەكە لە تۆڕەكەو دواكەوتنی دەنگدان، لە كاتی دانانەوەی ئامێرەكە داوای كۆدەكە دەكات، ئەو كۆدە پاش تێپەڕ كردنی كاتێكی زۆر دەبێت لە ناوەندی نیشتمانی داتاكان ئەو كۆدە داوا بكرێت لە لایەكی ترەوە بابەتی بایۆمەتری زۆر گرنگ و لە رووی زانستییەوە پشت پێ بەستراوە، لەبەر ئەوەی ئەگەر هاتوو كەسەكە پەنجەی لە ناو داتاكان تۆمار نەكرابێت، رێگە بە تێپەڕ كردنی قۆناغەكە نادات، تەنانەت ئەگەر كارتی بایۆمەتریش بوونی هەبێت، چونكە ئامێرەكە پەیامێكت پێ‌ دەدات كە ئەو پەنجە مۆرانە تۆمار نەكراون بە واتایەكی تر ئەو كەسە خاوەنی ئەو كارتە نییە. بۆیە بابەتی بردنە دەرەوەی ئامێرەكان بابەتەكی قەبوڵ نەكراوە لە رووی رێكارەكانی دەنگدانەوە.
لە بەشێكی دیكەی روونكردنەوەیان هاتووە" زۆربەی ساختەكارییەكان لە دوای كاتژمێری 10ی شەو ئەنجامدراون، ئەم هەوڵەی پارتیش دوای ئەوە دێت كە ئەنجامی دەنگدانی تایبەت بە دڵی ئەو حزبە نەبووە".
وەڵام: ئەو بابەتەش رێگە پێنەدراوە تەنیا ئەو كەسانە ئەو قسەیە باوەر دەكەن كە شارەزاییان بە ئامێرەكان نەبێت ئامێرەكان بە شێوەیەك رێك خراون رێك لە كات ژمێر 6ی ئێوارە لە كار دەخرێن لە لایەن مانگی دەستكردەوە و بە هیچ شێوەیەك ناكرێت، تەنانەت یەك دەنگیش پاش ئەو كات ژمێرە بخرێتە ناو سندۆقەكە، ئەگەر كاتەكە كۆتایی هات لە لایەكی ترەوە هەموو نوێنەری كیانەكان تا كۆتایی پرۆسەكە لە ناو بنكەی دەنگدانن تەنانەت بە هەر یەكە لە كیانەكان رێگە دەدرێت وێنەیەك لە شریتەكە لە گەڵ خۆیان ببەن.
ئەو شریتانەش لە سێ ‌وێنە ئامادە دەكرێن كە یەكێكیان بۆ نووسینگەی نیشتمانی و وینەیەك بۆ نووسینگەی پارێزگا و وێنەی سێهەم بۆ نووسینگەی مەركەزی تۆماری شارەكە دەنێردرێت، كە دەبێت هەرسێ‌ وێنەكان وەك یەك بن لە هەمانكاتدا دەبێت وەك ئەو زانیارییانە بن كە بە ئامێری ئار تی ئێس رەوانەی مەركەزی نیشتمانی دەكرێن.
لە كۆتایش دەڵێن " ئەگەر تانەكان لەلایەن كۆمسیۆنەوە قبوڵ بكرێت و پشتڕاست بكرێتەوە، بە ئەگەرێكی زۆر ئەنجامی دەنگدان لەهەر سێ بازنەكەی هەولێر گۆڕانكاری بەسەردا دێت، جگە لەبازنەی دوو. 
وەڵام: ئەو بابەتە زۆر بە ئاسانی یەكلایی دەكرێتەوە، لێرەدا كۆمیسیۆن پشت بە ئەو داتایانە دەبەستیت كە پاش كاتژمێر 6ی ئێوارە بە ئامێری ئار تی ئێس رەوانەی مەركەزی نیشتمانی كراون، لە گەڵ راپۆڕتەكان و هەروەها ئەو فۆرمەی بە ژمارەی 41 ئامادە كراوە، كە كۆمەڵێك زانیاری گرنگ لە خۆوە دەگریت، هەروەها بە ژماردنی دەستی ئەو سندۆقەی سكاڵای لە سەرە دەبێ هاوتا بكرێت، بۆیەش ئەو بابەتە بابەتێك نییە نەكرێت یەكلایی بكرێتەوە.

 

بابەتى پەیوەندیدار بیروڕا

زۆرترین بینراو