گەنجێن مە گرنگیێ ب موزیكا كوردی نادەن

گەنجێن مە گرنگیێ ب موزیكا كوردی نادەن

رەمەزان زەكەریا – رواندز: موزیكژەنێ بەرنیاسێ كوردستانێ سەید ئەحمەد رواندزی، كۆ دەمێ چەندین سالایە ب كەمانا خوە خزمەتا هونەر و موزیكا كوردی دكەت، د هەڤپەیڤینەكا زاری كرمانجی دا بەحسێ رەوشا هونەر و موزیكێدكەت ل باشوورێ كوردستانێ.
موزیكژەن سەید ئەحمەد رواندزی، بۆ زاری كرمانجی راگەهاند"ژبەر ڤێ رەوشا نوكە ل كوردستانێ هەی بۆیە ئەگەر كۆ كێمتر دەركەڤین سەرەرای كۆ ل بوارێ موزیكژەنیێ بەردەوامین بەلێكارێ ستۆدیۆ كێم بوون و بەرنامێن هونەری كێمبوون و جاران ل كوردستان تیڤی من بەرنامە هەبوون پشتی بەرنامە سالا 2006 راوەستای ئەز دووركەتم و نوكە دەستپێكریەڤە ل ناڤ ستۆدیۆ ژی بەردەوامبوومە ل كارێ هونەری دگەل هونەرمەندان".
گوتژی:" گەنجێن موزیكژەنێن باش هەنە ل كوردستانێ بۆ هەموو ئامێرێن موزیكێ بەلێ گەلەك حەش تەقلیدێ دكەن و گرنگیێ نادەنە موزیكا رەسەنا كوردی، پێدڤیە موزیكا كوردی پتر بهێتە پاراستن تاما موزیكا كوردی پێڤە دیاربیت، مخابن موزیكژەنێن گەنج پتر تەقلیدا موزیكا بیانی دكەن و كۆپی دكەن، یا بەرێ تامەكا تایبەت هەبوو ل سالێن 1980 هەتا سالێن 2000 موزیكێ گوهرین بسەر دا هاتیە و سانسۆر نەبۆیە لسەر موزیكێ و بەلاڤكرنا موزیك و سترانێن بیانی، ئەگەرەك بوو كۆ موزیكژەنێ كورد پتر تێكەلی موزیكا بیانی ببیت، سترانبێژ بۆ دروستكرنا بەرهەما دچوونە دەرڤەی كوردستانێ تایبەت توركیا و موزیكا بیانی راكێشا ناڤ موزیكا كوردی، ستۆدیۆیێن توركی ژلایێ تەكنیكێڤە د ئاست بلندن هونەرمەند ژی بۆ دروستكرنا بەرهەما سالێن بووری گەلەك دچوون بۆ توركیا كۆ ئەو ژی بوو چاڤلێكەری دناڤ هونەرمەندێن كوردستانێدا".
ئاشكراكر:" پێدڤیە موزیكا كوردی پێناسەیا تایبەت ب خوە هەبیت دەما كەسەك گوهداری دكەت، راستەوخۆ بزانیت ئەڤ موزیكە كوردیە، 70% موزیكا كوردی گوهرین بسەردا هاتیە كەسەك بیانی ئەگەر گوهداریا سترانەك كوردی بكەت دێب توركی هژمێریت، سەردەمێ خۆ هونەرمەندێن وەك ئەردەوان زاخۆیی و ئەیاز یوسف و چەندین هونەرمەندێن دی كاركریە ل دەمێ بووری هەتا نوكە بەرهەمێن وان گرنگیا خو هەیە نوكە ژی سترانبێژێن تازە سترانێن بەرێ نو دكەنەڤە ب موزیكەكا نو بەلێ نابیت دەستكاریا پەیڤ و ئاوازێن سترانێن فلكلۆر بهێتە كرن رەسەنایەتیا وێ بهێتە تێكدان نوكە بریارەك هەیە هەر سترانا كەڤن بهێتە نوكرن نابیت دەسكاری بهێتە كرن نەكو بەلاڤ نابیت".
خویاكر:"بۆ پاراستنا موزیكا رەسەنا كوردی ئەركێ سەرەكی لسەر وەزارەتا رۆشنبیریە و پێدڤیە پەرلەمان یاسایەكێ بۆ ڤێ مەبەستێ دەربكەت ب فەرمی نابیت ب چو رەنگا دەستكاریا پەیڤ و ئاوازێن فلكلۆر بهێتە كرن، ئەو كارێن نوكە دهێنە كرن نابیت ژ رەسەنەیاتیا وێ بهێنە لادان بكەڤیتە چارچوڤەكێ بیانی، موزیك یا بێسنوورە بەلێ ب مەرجەكێ پێناسەیا رەسەنا خوە ژ دەست نەدەت، وەزارەتا رۆشنبیری بەرپرسە بەرامبەر بەلاڤكرنا بەرهەمێ هونەری ل كوردستانێ".

زۆرترین بینراو