یوفا بڕیاری كۆتایی سزادانی نەدا

یوفا بڕیاری كۆتایی سزادانی نەدا

زاری كرمانجی- ئاژانسییە هەواڵییە وەرزشییەكان: بە فەرمی یوفا بڕیاری كۆتایی خۆی لەسەر سزادانی ریال مەدریدو بەرشەلۆنەو یوڤێنتۆس دا. 
دوایی چوونە دەرەوەی بەشێكی زۆری یانەكان لە سوپەرلیگ، تا ئێستا ریال مەدرید، بەرشەلۆنەو یوڤێنتۆس بە فەرمی كشانەوەی خۆیان لەم خولە رانەگەیاندووەو دەستبەرداری ئەم پاڵەوانییەتیە نوێییە نەبوون، هەر بەوهۆیەوەش یەكێتی تۆپی پێی ئەوروپا لە لێكۆڵینەوەی بەردەوام دابوو لەگەڵ ئەم سێ یانەیەو دەیویست، سزایان بدات و دوێنێش بڕیاری خۆیدا.
یەكێتی تۆپی پێی ئەوروپا، دوێنێ بەفەرمی بڵاویكردەوە، دوایی لێكۆلینەوەو بەدواداچوونێكی زۆر، بڕیاری كۆتایی دەربارەی چارەنووسی ریال مەدرید، بەرشەلۆنەو یوڤێنتۆس درا، بەجۆرێك لێكۆڵینەوە دەربارەی ئەم سێ یانەیە هەڵدەواسرێت، بەفەرمی بەشداری چامپیۆنزلیگی وەرزی داهاتووش دەكەن و هیچ یانەیەك دوور ناخرێتەوە.
ئەم بڕیارە لە كاتێك دایە، پێشتر یوفا هەڕەشەی لەم سێ یانەیە دەكردو دەیگووت" ئەگەر لە سوپەرلیگ نەكشێنەوەو دەستبەرداری ئەم بیرۆكەیە نەبن، لە چامپیۆنزلیگ دوور دەخرێنەوە و سزا دەدرێن".
میشێل پلاتینی، سەرۆكی پێشووی یەكێتی تۆپی پێی ئەوروپا دەربارەی سوپەرلیگ گووتوویەتی" ئەو یانانەی سوپەرلیگیان دامەزراند و دەیانویست بەشداری خولێكی جیاوازتر لە چامپیۆنزلیگ بكەن، مافی خۆیان بوو ئەم كارە بكەن"، بەڵام هەر دوێنێ دوای ماوەیەكی زۆر، بڕیاری كۆتایی درا و هیچ كام لەم یانانە، سزا نەدران و لە چامپیۆنزلیگیش دووریش نەخرانەوە.

زۆرترین بینراو