مامۆستایەكی رواندز پڕۆگرامێكی تایبەت بە وانەی وەرزش ئامادە دەكات

مامۆستایەكی رواندز پڕۆگرامێكی تایبەت بە وانەی وەرزش ئامادە دەكات

محەممەد مەحموود-رواندز 
شەهید سەباح، مامۆستای وانەی وەرزشە لە قوتابخانەی دواناوەندی رواندزی تێكەڵاو لە سەنتەری شاری رواندز، توانیوویەتی سوود لەوكاتە وەربگرێت كاتێك دەرگای قوتابخانەكان داخرابوون بەهۆی ڤایرۆسی كۆرۆناوە، ئەمە بۆ ئەو دەبێتە دەرفەتێك تاكوو بتووانێت بۆقوتابییانی پۆلەكانی 7–12 ئامادەیی پڕۆگرامێكی تایبەت بە وانەی وەرزش ئامادەبكات.
زاری كرمانجی لە نزیكەوە ئەو مامۆستایەی دوواند و باسی پەرتووكەی بۆ كردین و گووتی " نووسینی ئەم پەرتووكە بۆ وانەی وەرزش تایبەتە بە قوتابییانی قۆناغەكانی  7 تا 12 ئامادەیی ئەمەش لەو كاتەی بەهۆی ڤایرۆسی كۆرناوە تووشی كەرەنتینە بووین و لە ماڵ ماینەوە، تووانیم سوود لەو كاتە وەربگرم ئەو بیرۆكەییەی كە هەم بوو بیكەمە كردار ، ئەوەبوو پڕۆگرامی پەرتووكی وەرزیشم نووسی بۆ قوتابییانی قۆناغەكانی 7- 12 ئامادەیی دەتوانن سوودی لێوەربگرن، ئەگەر بێت و لە لایەن بەڕێوەبەرایەتی پڕۆگرامەكانی وەزارەتی پەروەردەوە پەسەندبكرێت بۆ خوێندن".
مامۆستا شەهید گووتیشی" دوای (3) ساڵ هەوڵدان و كاركركردن و بە دوادا گەڕانی سەرچاوەكانی وەرزش، تووانیم پڕۆگرامێكی تەواو و پڕ لە زانیاری بۆ پۆلەكانی 7 تا 12 ئامادەیی دروست بكەم، پەرتووكەكە لە ( 216) لاپەڕە پێك هاتووە، بابەتەكانی ناو پەرتووكەكە بریتین لە (تۆپی پێ و یاساكان و كارامەییەكان، تۆپی بالەو یاساكان و كارامەییەكانی ، تۆپی باسكەو یاساكانی و كارامەییەكانی ، تۆپی دەست و یاساكان و كارامەییەكانی ، فوتساڵ ، گۆڕەپان و مەیدان)".
ئەو مامۆستایە دەشڵێت" جیاوازی ئەم پەرتووكە ئەوەیە هەر بابەتێكم باس كردبێت چوار وێنەم لە گەڵی داناوە كە گوزارشت  لە نووسینەكە دەكەن، بەشێك لەوێنەكانیش بەبەرنامەی تایبەت دروست كراون، سوپاسی هەموو ئەوكەسانەش دەكەم كە هاوكارم بوون".
گووتیشی" لە گەڵ سەرۆكی لیژنەی پڕۆگرامەكان دكتۆرەڤیان كۆبوونەوەم كردوە، هیواخوازم بووم لیژنەی پڕۆگرامەكانی وەزارەتی پەروەردە بۆ ئەمساڵی خوێندن كاریان لەسەر كردبا  دڵنیام گشت پەرتووكەكەش نەبێ سەدا 90ی شایستەی ئەوەیە بكرێتە پڕۆگرامی قوتابخانەكان".
لە كۆتاییشدا مامۆستا شەهید سەباح گووتی"  پڕۆگرامی تێنسی سەرمێزیش بەمزوانە بەردەست ئەبێت، تێنسی سەرمێز پێویستە بخرێتە ناو پڕۆگرامی وەرزشی بۆ قۆناغەكانی 7 تا 12 چونكە سەدا90ی قوتابخانەكان یاریگای وەرزشییان نییە، ئەتوانن بۆ پڕكردنەوەی بۆشایی وەرزشی یاری تێنسی سەرمێز بە قوتابییان بكەن و كارامەییەكانیان فێربكەن و لە داهاتووش خولی تێنس لە ئاستی قوتابخانە و پەروەدە بكرێتەوە.

 

زۆرترین بینراو