كردنەوەی قوتابخانەكان جووڵەی خستۆتە بازاڕی سۆران

كردنەوەی قوتابخانەكان جووڵەی خستۆتە بازاڕی سۆران

رائیب زراری – سۆران :

بازاڕی سۆران جمەی دێت لە دایك و باوكی قوتابییان و هەمووی بۆ كڕینی جلوبەرگ و پێداویستی خوێندن و قوتابخانە هاتوون، هەندێك لەو دایك و باوكانە كە بۆ زاری كرمانجی قسەیان كردووە گلەیی لە گرانی نرخی جلوبەرگی قوتابییان دەكەن.
وەزارەتی پەروەردەی حكوومەتی هەرێمی كوردستان، بڕیارێكی لەبارەی یەكپۆشیی جلوبەرگی قوتابیان بۆ ساڵی خوێندنی 2021 - 2022 دەركرد، كە ئاراستەی سەرجەم باخچەی منداڵان، قوتابخانە بنەڕەتی و ئامادەییەكان كراوە تێیدا هاتووە" بۆ ساڵی خوێندنی 2021 - 2022 ئاگادارتان دەكەینەوە، پابەند بن بە پەیڕەوكردنی یەكپۆشیی جلوبەرگی قوتابییان لە قوتابخانە حكوومییەكان بۆ گشت قۆناغەكانی خوێندن". 
دایكان و باوكان سەرپشك و ئازادن لە دابینكردنی جلوبەرگ بۆ ڕۆڵەكانیان و بەهیچ شێوەیەك ڕێگە نادرێت بە بەرێوەبەری قوتابخانەكان دەست بخانە كڕینی جلوبەرگی قوتابییان، یا رێككەوتن لەگەڵ كۆمپانیا و پۆشاكفرۆشەكان و هیچ (لۆگۆیەك) و ناونیشانێك قبووڵ ناكرێت لەسەر جلوبەرگ هەبێت، رەنگی یەكپۆشی جلوبەرگی قوتابییان بەمشێوەیە: لە باخچەی منداڵان بۆ كچان رەنگی كراس پەمەیی و تەنوڕە رەساسی و بۆ كوڕان كراس شین و پانتۆڵی رەساسی بێت، بۆ قۆناغی پۆلەكانی 1 تا 6 ی بنەڕەتی بۆ كچان رەنگی تەنوڕە رەساسی و كراسیان سپی، بۆ كوڕان پانتۆڵی رەساسی و كراسی سپی بێت، لە قۆناغی بنەڕەتی پۆلەكانی 7 و 8 و 9 رەنگی تەنوڕەی كچان نیلی و كراسەكەیان سپی، بۆ كۆڕان پانتۆڵ نیلی و كراس سپی، لە قۆناغەكانی ئامادەیی رەنگی كراسی كچان پەمەیی و تەنوڕە رەش بێت، بۆ كوڕان پانتۆڵی رەش و كراسی سپی".
نازدار محەمەد، دایكی دوو منداڵە و منداڵەكانی لە قۆناغی بنەڕەتی دەخوێنن لە یەكێك لە دووكانەكانی كڕینی جلوبەرگی قوتابییان لە سۆران خەریكی كڕینی جلوبەرگ بوو، بۆ هەفتەنامەی زاری كرمانجی دیاركرد" سیستەمی یەكپۆشی قوتابییان، بڕیارێكی زۆر خراپ بوو، چونكە هەندێك كەس هەن رەوشی داراییان خراپە و ناتوانن هەموو جلوبەرگێگ بكڕن، بەڵام ئێستا لەبەر ئەو بڕیارە ناچارم جلوبەرگ بكڕم، خێرخوازێك هەندێك پارەی پێداوم بەس بۆ ئەوەی جلوبەرگی منداڵەكان بكڕم، هیوادارم ساڵانی داهاتوو بڕیاری لەو شێوەیە نەدرێت ئەگەرنا هەندێك دایك و باوك ناچارن منداڵەكانیان لە قوتابخانەكان بێنە دەرەوە، لەگەڵ ئەوەی داوا لە لایەنە پەیوەندارەكان دەكەین چاوێك بە بازاڕدا بخشێننەوە تا دووكانداران بە ئارەزووی خۆیان نرخەكان گران نەكەن".
دەشڵێ:" ساڵانی رابردوو هەندێك لە بەڕێوەبەری قوتابخانەكان لەگەڵ كۆمپانیاكان رێككەوتبوون، ئەوەش زیانێكی زۆری بە كەسوكاری قوتابیان گەیاندبوو، باشبوو ئەمساڵ بڕیارەكە گۆڕدرا".
شهاب عادل، هاووڵاتیەكی مێرگەسۆرە، بۆ هەفتەنامەی زاری كرمانجی دەڵێ:"  نرخی جلوبەرگی قوتابییان گرانە و هەندێك ماڵ هەیە پێنج  قوتابی هەیە و بار قورسی دەخاتە سەر كەسوكاری قوتابییان، بۆیە پێویستە لێپرسینەوە لەگەڵ ئەو بازرگان و دوكاندارانە بكرێت كە جلوبەرگی قوتابییان دەفرۆشن".
ئازاد عیسا، دووكانی جلوبەرگی هەیە بۆ هەفتەنامەی زاری كرمانجی گوتی:"  بازاڕی جلوبەرگی قوتابییان ئەمساڵ زۆر باشە، كە چەندین ساڵە بەو شێوەیە نەبووە، بۆ هەر قۆناغێك لە قۆناغەكان جلوبەرگێك دیاری كراوە، سەبارەت بە نرخەكانیش نرخەكان تا رادەیەك گونجاون و هەموو خەڵكێك دەتوانێت بیان كرێت.
عیسا، گوتیشی:" نرخی یەك كراسی سپی قوتابییان لە نێوان  10 هەزار تا  15 هەزار دینارە و نرخی یەك پانتۆڵی ڕەش بە  15 هەزار دینارە، تەنوڕەی كچانیش نرخەكەی لە نێوان 15 تا 25 هەزار دینارە، داوا لە بازرگانەكان دەكەم نرخی جلوبەرگی قوتابیان گران نەكەن تا ئێمەش بە گرانی بە كەسوكاری قوتابییان نەفرۆشین، بۆ ئەوەی هەمووان بتوانن بیكڕن و زۆریش لەسەر كەسوكاری قوتابییان نەوەستێت".

 

زۆرترین بینراو