ئادڤۆكات: ئامانجم گەیاندنی عێراقە بە مۆندیالی 2022

ئادڤۆكات: ئامانجم گەیاندنی عێراقە بە مۆندیالی 2022

 
زاری كرمانجی- ئاژانسییە هەواڵییە وەرزشییەكان: دیك ئادڤۆكات، راهێنەری هەڵبژاردەی عێراق دەڵێت" ئامانجی گەیاندنی هەڵبژاردەی عێراقە بە مۆندیالی 2022ی قەتەر".
ئادڤۆكات لە كۆنگرەی رۆژنامەوانی بەر لە یارییەكەی سبەی پێنجشەممە بەرامبەر كۆریای باشوور گووتی" عێراق داوای لێكردم ببمە راهێنەری هەڵبژاردەكە بۆ ئەوەی هاوكاریان بكەم بۆ گەیشتن بە مۆندیال، ئامانجی منیش ئەوەیەو دەمەوێ ئەوە بكەم، ئەمە بۆ من هەموو توانایەكم لەپێناویدا دەخەمەگەڕ".
راهێنەرە هۆڵەندییەكەی هەڵبژاردەی عێراق لەبارەی یارییەكەی بەرامبەر كۆریا گووتی" كۆریای باشووی بەربژێرێكی بەهێزە بۆ گەیشتن بە مۆندیال، بەڵام بۆ یارییەكە هەستێكی باشم هەیە و پێموایە یارییەكە بۆ كۆریا قورس دەبێت".
ئادڤۆكات گووتیشی" كۆریا هەڵبژاردەیەكی بەهێزە، لە ماوەی رابردوودا پێشكەوتنی زۆری بەخۆیەوە بینیوە, لەو كاتەوەی راهێنەرایەتی هەڵبژاردەكەم وەرگرتووە كار لەسەر بەرزكردنەوەی توانای جەستەیی یاریزانەكان دەكەم، ئەمە ئەو بەشەبوو كە بەلای منەوە زۆر گرنگبوو، ئەمە كاتێكی درێژ نیە پێكەوەین، 2 بۆ 3 هەفتەیە، بەڵام یاریزانەكان دەیانەوێ كاری باش بكەن، ئێمە تیپێكی پرۆفیشناڵین و نامانەوێ كات لەدەستبدەین".
راهێنەری عێراق دەڵێت" بەر لە یارییەكەی بەرامبەر كۆریا تەنیا یەك كێشەمان هەیە، ئەویش ئەوەیە یاریزانەكان درەنگ پەیوەندییان بە هەڵبژاردەكەوە كرد، ئێمە تەنیا یەك بۆ دوو هەفتەمان هەبوو بۆ ئەوەی خۆمان ئامادە بكەین، بەڵام سەرەڕای ئەوەی كاتێكی كەممان لەبەردەست بوو بۆ یارییەكە ئامادەین و تیپێكی باشمان هەیە".
لەلایەن خۆیەوە عەلی عەدنان، ئەستێرەی هێڵی بەرگری هەڵبژاردەی عێراق لەبارەی یارییەكەوە گووتی" ئامادەكارییەكی باشمان كردووە، بەرامبەر یەكێك لە باشترین تیپەكانی ئاسیا یاری دەكەین، یارییەكە بۆ هەردوو هەڵبژاردە ئاسان نابێت".
لە دەستپێكی ركابەرییەكانی قۆناغی كۆتایی پاڵاوتنەكانی كیشوەری ئاسیا بۆ مۆندیالی 2022، هەڵبژاردەی عێراق لە سیئۆل دەبێتە میوانی كۆریای باشوور، لەو یارییەدا كە كاژێر 2 ی پاشنیوەڕۆ بەكاتی باشووری كوردستان ئەنجام دەدرێت.
بۆ یارییەكە هەڵبژاردەی عێراق لە تواناكانی هەریەكە لە سەفا هادی، بەهۆی پێكان، سەعد ناتق و هومام تاریق، بەهۆی وەرگرتنی كارتە زەردەكانەوە بێبەش دەبێت.
لە ریزەكانی هەڵبژاردەی عێراق تەنیا یەك یاریزانی كورد هەیە كە شێركۆ كەریم، یاریزانی یانەی هەولێرە، چاوەڕوان دەكرێت لە یارییەكەدا یاریزانەكە بەشێوەی سەرەكی لە باڵی راستی بەرگریدا یاری بكات.
بەر لە 24 كاتژمێر لە دەستپێكی یارییە گرنگەكەی نێوان هەردوو هەڵبژاردەی عێراق و كۆریای باشوور هەردوو راهێنەرەكە لە پرێس كۆنفراسی تایبەت بەو یارییە بۆچوونی خۆیان ئاشكرا كرد.
لەم بارەیەوە سەرەتا ئەدڤوكات راهێنەری هۆڵەندی هەڵبژاردەی عێراق گووتی" زۆر دڵخۆشم كە جارێكی دیكە دەگەڕێمەوە كۆریا پێشتر لێرە راهێنەرایەتی ئەو هەڵبژاردەم كردوە، ئێستاش ئەمجارە عێراق داوای لێكردم بۆ سەركەوتن بۆ مۆندیال ئەركی هەڵبژاردەكە وەربگرم، یاری سبەی قورس دەبێت بەڵام ئێمە بۆ بەدیهێنانی ئامانجەكانمان هەموو هەوڵێك دەدەین تا بەئاست و ئەنجامێكی باش بچینە دەرەوە.
لەلایەكی دیكەوە بینتۆی راهێنەری هەڵبژاردەی كۆریا گووتی" دەزانم عێراق لە زۆربەی یارییەكان بە 4-5 بەرگریكار یاری دەكات، ئەوان شەڕانگێزانەو زۆر بەتوندی یاری دەكەن، بۆیە پێویستە بە باشی مامەڵە لەگەڵ ئەو یارییە بكەین تا بە 3 خاڵی یارییەكە بچینە دەرەوە.

زۆرترین بینراو