غەدەرێك ئاوێتەی فیستیڤاڵ دەكرێت

ئیسماعیل ئیبراهیم

لە چوارچێوەی فیستیڤاڵێكی رێكخراو لەلایەن بەشی رۆشنبیری و هونەری سۆران، چەند رۆژێكی دیكە سنووری ئیدارەی سەربەخۆی سۆران باوەش بۆ مۆسیقا و شانۆ و كارە هونەری و ئەدەبییەكان دەكاتەوە، بۆ ئەم مەبەستەش میوانداری هونەرمەندان و شانۆكارانی چەند شار و شارۆچكەی دیكەی كوردستان دەكەین. دڵنیاشم هاووڵاتییانی سەنگین و میوانی دۆستی ئەم دەڤەرە لە ئاست مەزنایەتی ئەو مێوانداری كردنە دەبن.
 هەر چەندە ئەم جۆرە چالاكییانە بۆ ئەم دەڤەرە نوێی نین، لەبەر ئەوەی مێژوویی شانۆ و مۆسیقا و هونەر بۆمان دەسەڵمێنن كە زیاتر لە سەدەیەكە نەوەكانی ناوچە شاخاوییەكانی رواندز و باڵەكایەتی و مێرگەسۆر و پێ دەشتەكانی دیانا و مێژووی دەوڵەمەندی مەجێسەری دەڤەری برادۆست هەڵقووڵاوی نۆت و فڵچە و دەقەكانن، تەنها ماوەتەوە روح بە بەر پەیكەرەكان دابێنەوە ئەمەش لە رووی لۆژیكییەوە كردەیی نییە.
چەند رۆژ لەمەو بەریش لە مەراسیمێكی شایستەدا لە باخچەی زاری كرمانجی و بە ئامادە بوونی سەدان كەس كتێب دابەشكرا.
واتە ئەم دەڤەرە لە خۆرسكییەوە خاوەن پێكهاتەیەكی زیندووە و چالاكە، خاوەن تاكێكی بەهێز، بەتوانا و خاوەن شەحامەتێكی جیاوازترە لە ناوچەكانی دیكە، بۆیەش دەست بۆ هەر بوارێك ببەن سەركەوتوو دەبن.
ئەوەی مەبەستمە باسی لێوە بكەم، ناو نیشانی ئەو لایەنەیەكە بەم چالاكییە جوانە هەڵدەستێت، كە بە بەشی رۆشنبیری ناوی هاتووە.
ئەم ناونیشانە بۆ رۆشنبیری و هونەری سۆران نەك هەر غەدر كردنە لەو توێژانەی بەم دامەزاوەوە بەستراونەتەوە بەڵكو غەدر كردنە لە مێژووی قوڵی ئەم دەڤەرە لە بواری رۆشنبیری و هونەری، كاتێ لەم دەڤەرە شانۆ، مۆسیقا، وێنە، پەیكەرتاشی و هونەری كاریكاتێر هەبوو لە كەمترین شار و شارۆچكەكانی كوردستان دەستیان بۆ ئەم بابەتە دەبرد.
مەرج نییە لەبەر ئەوەی سۆران پارێزگا نییە لەرووی ئیمكانیات و دەستڵاتەوە سنووردار بكرێت، یا كەسانێك لەوەزارەتەكان بە ئارەزووی خۆیان یا لە پێناو بەرژەوەندی خۆیان لە سەر بنەمای شارچییەتی بیانەوێت لە پێگە و قوورسایی مێژوویی و هەنووكەیی ئەم دەڤەرە كەم بكەنەوە.
 بۆیە زۆر پێویستە لایەنە پەیوەندارەكان بەتایبەتیش سەرپرشتیاری ئیدارەی سەربەخۆی سۆران گرنگییەكی تایبەت بەم بوارە بدات و ئەو غەدرە كە بەهۆی بچووك كردنەوەی بەڕێوەبەراتی رۆشنبیری و هونەری سۆران بۆ (بەش ) لەم دەڤەر و توێژە كراوە بسێنێتەوە.
پێویستیشە هەموو چین و توێژەكان لەم بارەیەوە گوشار دروست بكەن تا ئەم مافە بگەڕێندرێتەوە بۆ سۆران.
هیچ لۆژیكی نییە لە بەڕێوەبەراتی گشتی رۆشنبیری و هونەری هەولێر و وەزارەتی رۆشنبیری بەمشێوەیە مامەڵە لەگەڵ رۆشنبیران و هونەرمەندانی ئەم دەڤەرە بكرێت، دڵنیام ئەگەر لایەنە پەیوەندیدارەكان لە كڕۆك و جەوهەر و مێژووی ئەم دەڤەرە لە بواری رۆشنبیری و هونەری و رۆژنامەگەری گەیشتبان هەرگیز جورعەتی ئەوەیان نەدەدایە خۆیان بەڕێوەبەراتی بكەنە بەش، ئەگەر بەرپرسانی ئەوسای ئەم شارە خەمخۆری راستەقینەی ئەم دەڤەر بان هەڵوێستیان دەنواند و رێگەیان نەدەدا ئەم كارە بكرێت، ئێستاش كە سۆران كراوەتە ئیدارەی سەربەخۆ و گۆڕانكاری لە بەرپرسانی حزبی و حكومی كراوە نابێ ئەم ناحەقییە قبول بكرێت و پێویستە بە زووترین كات بەشی رۆشنبیری سۆران بكرێتەوە بەڕێوەبەرایەتی، هیوادارم بەرپرسانی ئەم دەڤەرە لە رۆژی كردنەوەی ئەم فیستیڤاڵە ئەو مزگێنییە بدەنە رۆشنبیران و هونەرمەندان كە بەشی رۆشنبیری دەكرێتەوە بەڕێوەبەراتی. 

 

 

زۆرترین بینراو