سكالۆنی: یاری لەگەڵ پارەگوای ئاسان نابێت

سكالۆنی: یاری لەگەڵ پارەگوای ئاسان نابێت

زاری كرمانجی- ئاژانسییە هەواڵییە وەرزشییەكان: لیۆنێل سكالۆنی، راهێنەری هەڵبژاردەی ئەرجەنتین رایگەیاند هەڵبژاردەی پاراگوای ركابەرێكی بەهێزەو رووبەڕووبوونەوەیان ئاسان نابێت.
كاتژمێر 3 ی بەرەبەیانی سێشەممە بە كاتی باشووری كوردستان، هەڵبژاردەی ئەرجەنتین لە سێیەم گەڕی یارییەكانی قۆناغی كۆمەڵەكانی كۆپا ئەمریكادا، رووبەڕووی هەڵبژاردەی پاراگوای دەبێتەوە.
سكالۆنی راهێنەری هەڵبژاردەی ئەرجەنتین لە كۆنگرەیەكی رۆژنامەوانی بەر لە یارییەكەدا قسەی بۆ رۆژنامەوانان كردو گووتی" پاراگوای ركابەرێكی ئاسان نیەو زۆر قوڕسە، دەزانێت چی دەكات و راهێنەرێكی گەورەی هەیە".
سكالۆنی لە بەردەوامی قسەكانیدا، پەسنی لیۆنێل مێسی ئەستێرەو كاپتنی تیپەكەی دا و گووتی" پێموایە سەركردایەتی مێسی هەمیشە لەسەر گۆڕەپانەكە وەك خۆیەتی، لە دەرەوەش كوڕێكی باشە، سەركردایەتی گرووپەكە دەكات و وەك هەمیشە بەرەو پێشەوە دەبات".
ئەو ئاماژەی بۆ ئەوەش كرد كە بڕیارەكانی بە هێنانی كۆمەڵێك یاریزان بۆ كۆپا ئەمریكا راست و درووست بوونەو گووتی" دەزانم كە هەندێك یاریزان بە درووستی گەیشتوونەتە كۆپا ئەمریكاو دەبێ گرنگییان پێبدەین، هەندێك یاریزانیش هەن بە باشی دەركەوتوون و بوونەتە بەشێك لە تیپەكە، بۆیە ئێمە بۆ یاریكردن خولەكی زیاتریان پێدەدەین".
راهێنەری تانگۆ سەبارەت بە لاوتارۆ مارتینێزیش قسەی كرد و گووتی" ئەو بەشێكە لە تیپەكەمان تا من راهێنەربم، دەمەوێ دووپاتیبكەمەوە كە زۆر لەو رازین و ئەو دەزانێ بیر لە چی دەكەمەوە، جگە لەوەی لەسەر گۆڕەپانەكەدا پێشكەشی دەكات، ئێمە زۆریش خۆشمان دەوێت".
هەروەها سكاڵۆنی باسی سیرجیۆ ئەگوێرۆشی كردو دەرگای بەكراوەیی بۆ بەجێهێشت بۆ ئەوەی بەرامبەر پاراگوای یاری بكات و گووتی" بێگومان ئەگوێرۆ ئەو یاریزانەیە كە ئێمە دەمانەوێت، ئەو زۆر یاری نەكردووە، بەڵام ناوی لە لیستەكەدایەو هەلی یاریكردنی هەیە، ئەو هەموو رۆژێك لە پێشكەوتندایەو یاریزانێكی گرنگە بۆ ئێمە".

زۆرترین بینراو