عادل: خۆم رادەستی ناخۆشییەكان نەكرد

عادل: خۆم رادەستی ناخۆشییەكان نەكرد

زاری كرمانجی- ئاژانسییە هەواڵییە وەرزشییەكان: گەنجێكی میسری دەبێتە سەرتۆپی ئەو كەسانەی بەهۆی هەر روداوێكەوە دووچاری لەدەستدانی یەكێك یان بەشێك لە ئەندامەكانی جەستەیان دەبن، ئەو گەنجە ئەگەرچی دوو قاچی لەدەستدەدات، بەڵام هیوایەكی گەورە بۆ دەستكەوتەكانی ژیانی بەدەست دەهێنێتەوە.
لە هەموو كۆمەڵگەیەكدا پاڵەوانی زۆر و كەسانی سەركەوتوو هەن، بەڵام مەرج نیە هەمو كات تیشك لەسەریان بجوڵێتەوە و چاوەكان بۆ ئەوان لە تێڕاماندا بن، بەڵام كاتێك كەسێك بەبێ بونی دوو قاچ دەبێتە پاڵەوانی وڵاتەكەی و وەك وەرزشكار و خوێندكاری زانكۆ باشترین ئاستەكان پێشكەش دەكات، هەموان دەبنە پشتیوان و پشتگیری.
بەگوێرەی هەواڵی ماڵپەری سكای نیوزی عەرەبی، ئەو گەنجە ناوی (عادل موسەدەق ئەلحوت)ە و خەڵكی شاری ئەبو كەبیرەی سەربە پارێزگای شەرقیەیە، بەهۆی روداوێكی هاتوچۆوە هەردوو قاچی لەدەستدەدات، بەڵام لای ئەو ژیان ناوەستێت و خولیاكانی دەهێنێتە دی.
عادل موسەدەق لە بیستەكانی تەمەنیدایە و لە وەرزشی بەرزكردنەوەی قورساییدا چوارجار لەسەریەك پاڵەوانی میسر بووە، جگە لەوەی وەك خوێندكاری زانكۆ بەرزترین نمرەكانی ساڵانەی كۆكردۆتەوە.
لە چاوپێكەوتنێكیدا لەگەڵ سكای نیوز ئەلحوت گووتویەتی" كاتێك روداوەكە بەرۆكی گرتم ژیانێكی تاڵ و بەڕێكردنی رۆژە سەختەكان بۆ من كارێكی قورس بوو، بەڵام لەدوای بیركردنەوەیەكی قوڵ گەیشتمە ئەو بڕوایەی ناكرێت خۆم رادەستی ناخۆشییەكان بكەم و هەموو ئەوەی رویدابوون بۆ ئەرێنی گۆڕان و ژیانێكی نوێم دەستپێكرد".
ناوبراو لەكۆتایی قسەكانیدا باسی لەوە كردوە كە توانیویەتی خەونەكانی بەدەستبهێنێت و ئەوەی مەبەستی بووە پێی بگات، بەو هۆیەوە لای میسرییەكان دەبێتە جێی سەرنج و ستایشی هەموو كارەكانی دەكرێت، چونكە ئیرادەیەكی پۆڵایینی هەبووە و پێداگری بووە لەسەر خۆبەدەستەوە نەدان بۆ كارەساتەكان.

زۆرترین بینراو