لە ڤیستیڤاڵێكدا دەڤەری سۆران مۆسیقا و شانۆ لە باوەش دەگرێت

لە ڤیستیڤاڵێكدا دەڤەری سۆران مۆسیقا و شانۆ لە باوەش دەگرێت

زاری كرمانجی-سۆران : 

لە ژێر چاودێری هەڵگۆرد شێخ نەجیب سەرپەرشتیاری ئیدارەی سەربەخۆی سۆران، بەشی رۆشنبیری و هونەری سۆران بە دروشمی (شانۆی شەقام، گەڕاندنەوەی ژیانە بۆ مرۆڤایەتی) یەكەمین فیستیڤاڵی شانۆی سەر شەقام لە سۆران –رواندز لە رێكەوتی 28-10-2021 ئەنجام دەدات و بۆ ماوەی 3 رۆژ بەردەوام دەبیت.
باپیر عومەر رواندزی بەرپرسی بەشی رۆشنبیری و هونەری سۆران لە لێداونێكی تایبەت بە زاری كرمانجی زانیاری زیاتر لەبارەی فیستیڤاڵەكەوە دەخاتەروو و دەڵێ‌"فیستیڤاڵی شانۆی سەر شەقام بە میوانداری 8 گروپی شانۆ لە شارەكانی(كەركووك، دهۆك، سلێمانی، هەڵەبجە، كۆیە، دەربەندیخان، گەرمیان، پیرەمەگروون) و گروپی شانۆی سەرشەقامی سۆران و گروپی بالێ سلیمانی و  پەیمانگەی هونەرە جوانەكانی رواندز بەرێوەدەچێت"،
رواندزی باس لە رۆژانی بەرێوەچوونی فیستیڤاڵەكەو ئەو شوێنانە دەكات كە نمایشی شانۆیەكان لەباوەش دەگرێت و دەڵێ‌"دەستپێكی كردنەوەی فیستیڤاڵەكە، كاتژمێر 10 ی سەرلەبەیانیی 28 ی ئەم مانگە لە هۆڵی بۆنەكانی سۆران بە پێشكەشكردنی گۆرانی و موزیك دەبێت و ئێوارەی هەمان رۆژ لە هاوینەهەواری بێخاڵ چالاكییەكی تر دەبێ، ئەو شوێنانەی كە شانۆی شەقامی تێدا ئەنجام دەدرێت (سۆران – فلكەی پێشمەرگە ناو بازار، دیانا – ناوبازار، رواندز – ناوبازار، رواندز-شەنگلبانە، رواندز-سەرخەرەند، رواندز – كاولۆكان )، شەوانەش بە چەندین چالاكی رۆشنبیری لە شێوەی كۆڕ و سمینار فیستڤاڵەكە بەردەوامی دەبێت"،
لەم فیستیڤاڵەدا باشترین دەق و دەرهێنەر و نمایش و ئەكتەری كوڕ و كچ لەلایەن لیژنەیەكی شارەزا دیار دەكرێن و خەڵات دەكرێن و فیستیڤاڵەكەش بە سپۆنسەری میدیایی كوردستان TV یە. 

زۆرترین بینراو