لە سیدەكان پەكەكە بازگە دادەنێت و پارە لە هەنگەوانان وەردەگرێت

لە سیدەكان پەكەكە بازگە دادەنێت و پارە لە هەنگەوانان وەردەگرێت

زاری كرمانجی – سیدەكان : هەندێك لە هەنگەوانان كە لە سیدەكان هەنگەكانیان دەگواستەوە ناوچە گەرمیانەكان، دەڵێن، پەكەكە لە هەندێك ناوچەی سیدەكان، بەتایبەتی لە بەردە بووك بازگەی داناوە و بۆ هەر بارێك 10 هەزار دینارمان لێ وەردەگرێت.
ماوەیەك بەهۆی ئەوەی توركیا تۆپبارانی سنووری سیدەكانی نەكردووە، ئەوەش وای كردووە كە ژمارەی چەكدارانی پەكەكە زیاد ببن، هەر ئەوەش وای كردووە كە بازگە دابنێن و پارە لە ئاژەڵداران و هەنگەوانان وەربگرن.
لە هەرێمی كوردستان ١٠ هەزار و ٦٠٠ هەنگەوان ئەندامن لە تۆڕی هەنگەوانانی كوردستان، ساڵانەش لە كۆنگرەی وڵاتانی عەرەبی بۆ هەنگەوانان بەشداری دەكەن، گرنگی ئەم جۆرە كۆنگرانە بۆ هەنگەوانانی كوردستان لەوەدایە كە دەتوانن پەیوەندی بە كۆمپانیاكانی بەرهەمهێنانی هەنگوین بكەن و هەنگوینەكەیان هەناردەی وڵاتانی دنیا بكەن.
محەمەد حوسێن، كە شەوی رابردوو هەنگەكانی لە بەردەبووك دەگواستەوە بۆ سۆران، بۆ ماڵپەڕی زاری كرمانجی دیاركرد:" لە كوێستانەكان لەوەڕ بۆ هەنگەكان نەماوە، هەر ئەوەش وای كردووە هێشتا هەر لە وەرزی هاوین هەنگەكان بۆ گەرمیانەكان بگوازینەوە.
حوسێن، دەشڵێ:" شەوی رابردو لە كاتی گواستنەوەی هەنگەكانم لە هەندێك ناوچەی سیدەكان پەكەكە بازگەی دانابوو، لە هەر هەنگەوانێك 10 هەزار دیناری وەردەگرت، لەگەڵ ئەوەش ژمارەیان زۆر زیاد بووە، ئەوەش ترسی خستبووە ناو دڵمان و لەبەر شەڕ و تۆپبارانی توركیا ناچار بووین هەر زوو هەنگەكانمان بگوازینەوە".
شارك چەتۆ، هەنگەوانێكی دیكەیە بە ماڵپەڕی زاری كرمانجی گوت:" ئەگەر هاتبا پەكەكە لە گوند و ئاواییەكان نەبایە، توركیاش بۆردومانی ناوچە سنوورییەكانی نەكردبایە، ساڵانە كوردستان پڕ دەبوو لە هەنگوین، كە هەنگوینی كوردستان یەكێكە لە باشترین جۆرەكانی هەنگوین نەك لە ناوچەكە، بەڵكو لە هەموو جیهان، ئەوەش هۆكارە كە خواستێكی زۆری لەسەر بێت و رەوانەی دەرەوە بكرێت".

زۆرترین بینراو