بەغداد و هەولێر.. تەواوكەری یەكتر نەك دژ و ناحەز

نەوزادی موهەندیس

 

لەم ڕۆژانەدا دوو ساڵی تەواو تێپەڕ بوو بەسەر پڕۆسەی ڕیفراندۆمەكەی 25 ئەیلولی ساڵی 2017دا، كە بەداخەوە نەتواندرا مەبەست و ئامانجە سەرەكییەكەی ئەو پڕۆسە پیرۆزە وەدی بهێندرێت، لەلایەك بەهۆی هۆكاری خودی ناوخۆیی و لەلایەكی تریشەوە بەهۆی هۆكارە بابەتییە دەرەكییەكان لە ناوچەكە و دونیاشدا. لێرەدا هیچ مەبەستمان نییە كە برینی ئەو پڕۆسە شكستخواردووە بوكلێنینەوە یا تۆمەت بخەیەنە پاڵ هیچ سەركردە و حزبێكی سیاسی، هێندەی مەبەستمانە كە لەم یادەدا بیری هەمووان بهێنینەوە بەوەی كە پەندێكی قوڵمان لەو ڕۆژانە وەرگرتبێت و بەسەر كار و كردەوە و گوتارو هەڵە و سۆزەكانماندا بچینەوە و پێ بە هەڵە و كەموكوڕییەكانی خۆمان بنێین و هەوڵی ڕاستكردنەوەشیان بدەین، نەك هەر سووربین لەسەر هەڵەكانمان لە تێڕاونینی بابەتەكە و خوێندنەوە و هەڵسەنگاندنی هاوكێشەی هێزەكان و هاوسەنگی دونیا و ناوچەكەش لەنێوان زلهێزە دونیایی و هەرێمییەكاندا و بەهەمان شێوەش هەڵسەنگاندنێكی ڕاست و دروستیش بكەین بۆ دۆخی سیاسی و ئابووری و ئەمنی و كۆمەڵایەتی ناوخۆی نێوماڵی كورد خۆشمان.
مەسەلە و پرسی سەربەخۆیی و دامەزراندنی دەوڵەتی كوردی پڕۆسە و ئامانجێكە كە هیچ تاكێكی كورد لە بیری ناكات و هەمیشە خەونێكی زیندووە لە بیر و هزر و كردەوە و گوتاری تەواوی كورد زمانەكاندا، بۆیە هیچ كات ترسی لەبیركردنی ئەو پرسە گرنگە ناكرێت، هەر بۆیەش پەلەكردن و دەستبردن بۆی جارێكی دی بەبێ ئامادەسازی تەواوەتی هیچ پێوست نیە و دەكرێت خەباتی ڕاستوڕەوان و پشوو درێژی شۆڕشگێڕانەی كوردایەتی درێژە و بەردەوامی پێبدەین بۆ وەدەستهێنانی ئەو ئامانجە زۆر پیرۆزەمان لە دۆخێكی گونجاو و لەبارتردا كە هەموو هۆكارە ناوخۆیی و دەرەكییەكان پشتیوان بن نەك دژ.
لەئێستادا و دوای 2 ساڵ تێپەڕبوون بەسەر ئەو نسكۆ كاتییەدا، هەق وایە سەركردایەتی سیاسی كورد و تەواوی حزبە سیاسییەكان و دامودەزگا و ئۆرگانە شەرعییەكانی حكومەتی هەرێم لەسەرۆكایەتی هەرێم و پەڕلەمان و حكومەتی كابینەی نوێ، هەوڵی جدی بدەن بۆ چێكردنی پڕۆسەیەكی ئاشتەوایی ناوخۆیی لەكوردستان و یەكخستنی هەوڵ و گوتار و كردارەكان لەبەرامبەر ئەم دۆخە نوێیەی كە لەپێشماندایە، لەهەڵبژاردنی ئەنجوومەنی پارێزگاكان لە عێراقدا لە 1ی نیسانی 2020 و چێكردنی پڕۆسەی سەر ژمێری گشتی لە مانگی تشرینی یەكەمی ساڵی ئایندەدا، كە بۆ كورد هەردوو پڕۆسەكە گەلێك گرنگ و ژیارین و ناكرێت پشتگویێ بخرێن و بەخەمساردییەوە لێیان بڕواندرێت بەهۆی هەندێك كێشە و ململانێی ناڕەوای سیاسییەوەو ناوچە دابڕێنراوەكانی كوردستان و مادەی 140ی دەستور بكرێنە قۆچی قوربانی حەز و ویستە حزبییە تەسك و بچووكەكان.
دواتریش هەقە ئەم هێز و توانا یەك و یەكگرتووەی كورد و هەرێمی كوردستان بە ئاڕاستەی بەغداد هەنگاو بنێت و بەهێزەوە بچێتە سەر مێزی گفتوگۆكان و ڕاست و دروستی كێشە كەڵەكە بووە سیاسی و ئابووری و ئەمنی و جوگرافی و ..هتد، لەگەڵ دەسەڵاتدارانی ناوەند لە بەغداد گەنگەشە بكات بۆ گەیشتن بەڕێكەوتنێكی كۆنكرێتی لە پێناو وەدەستخستنی مافە ڕەواكانی گەلەكەماندا. چونكە ناكرێت میلەتەكەمان هەمیشە لە دڵەڕاوكێ و ترس و تۆقاندندا بژێت و هەست بە ئارامی و خۆشگوزەرانی نەكات و وڵاتیش هێواش هێواش بەرەو دواوە بگەڕێتەوە بەهۆی عینادی و غروری سیاسی سەركردەكانەوە، میلەتكەمان ناتوانێت تاسەر بەرگەی برسێتی و نەبوونی مووچەو وێران و كاولبوونی زیاتری وڵات بگرێت، بۆیە ڕاستترین سیاسەت و بیركردنەوە و پلان لەم قۆناغەدا گەیشتنە بەڕێكەوتن لەگەڵ بەغدادا و گەیشتنە بەڕێكەوتن لەسەرهەموو مەسەلەكانی هێزی پێشمەرگە و بودجە و ناردنی مووچە و مەلەفی نەوت و ئەمنی و ئەوانی تریش.
پێویست دەكات بەغداد و هەولێر ببنە تەواوكەری یەكتری نەك دژو ناحەز، چونكە بە تەبایی و لێكتێگەیشتن دەتوانرێت زۆر ئامانج و خواست و مافەكان وەدەستبێنین نەك بە جەنگ و توندوتیژی، بەتایبەتیش كە لەم قۆناغەدا ناوچەكە بە عێراق و كوردستانیشەوە ڕووبەڕووی ململانێ و ئاڵنگاری زۆر مەترسیدار دەبنەوە لەنێوان وڵاتانی ناوچەكە و ئەمریكا لەلایەك دژ بە ئێران و هاوپەیمانەكانی لەلایەكی ترەوە، كە بەداخەوە عێراق و كوردستانیش بیانەوێت یا نا بوونەتە بەشێك یا ڕاستتر بوونەتە گۆڕەپانی سەرەكی یەكلاكردنەوەی ئەو ململانێیانە، بۆیە تەنها بە یەك و یەكگرتوویی هەولێر و بەغداد دەتواندرێت هەڵوێستێكی هاوسەنگانە بگیرێتە بەر و هەموان لەشەڕ و ماڵوێرانی و پڕیشكی ئەو ئاگرەی كە لە بەردەم قاپی عێراق و كوردستاندایە بپارێزێت .

بابەتى پەیوەندیدار بیروڕا

زۆرترین بینراو